Жас рационализатордың бағалы еңбегі

Жаңалықтар

30.03.2018, 17:21

Жамбылдық теміржолшылар қатарында өнертапқыштар белсенділігі басым. Бұл мақсатта нақты нәтиже көрсетіп жүрген жастарға қолдау жоғары. Мысалы, Жамбыл магистральдық желі бөлімшесіне қарасты Шу машиналандырылған жол дистанциясының маманы Нұрлан Қалынғараев – сегіз рационализаторлық ұсыныстың авторы. Ұлттық компания тарапынан жастар саясатын ширату мақсатында ұйымдастырылған әрбір шараның бел ортасынан табылатын жастың «Доңғалақ жұбын немесе нығыздауыш блогын ілуге арналған көтергішін қолдану» тақырыбындағы рационализаторлық ұсынысы басшылық тарапынан үлкен қолдауға ие болып, еңбегі жоғары бағаланып отыр. Нұрлан Қалынғараев аталмыш мекемеде 2011 жылдан бері еңбек етіп келеді. Жас маман өзінің ұсынысы жайында: «Бұл жетілдірілген көтергiштi енгiзу арқылы тәптәуір ақшалай үнемге қол жеткізуге болатынын дәлелдеуге тырыстым. Кез келген өнертапқыштық ұсыныстың пайдасы оның экономикалық тиімділік әкелуінде екені белгілі. Сондықтан мен қандай да бір істі қолға алсам, ең алдымен оның өндіріске пайдасын ойлаймын», – деп ой түйеді. Жалпы, Шу машиналандырылған жол дистанциясы – соңғы бес-алты жылдың көлемінде ұлттық компания тарапынан рационализаторлық қызметті ұйымдастыруда үздік танылып келе жатқан мекеме. Өйткені, өткен жылдың қорытындысы бойынша кәсіпорын тағы да «Рационализаторлық қызметті ұйымдастыру бойынша үздік филиал» атанды. Бұл мақсатты жұмыстар мен нәтижелі көрсеткіштердің жемісі болса керек. «Біздің ұжымда өндірісті жақсартуға бағытталған кез-келген жақсы жаңалық, ұсыныс-пікір болса дереу қолдауға ие болып, жаңалық ашам деушілерге барлық жағдай жасалады. Сондықтан, директордан бастап қатардағы жұмысшыға дейін жаңалыққа жаны құмар. Осындай ұжымда еңбек етіп, тәжірибе жинаған мен - жолым болған жігітпін» деп мақтаныш етеді ұжымын Нұрлан.

Жас рационализатордың бағалы еңбегі

Басқа да жаңалықтар

Қазақстан теміржолшысы газеті, №65 18 тамыз 2026 жыл