Құрт ауруымен күрес

Жаңалықтар

30.03.2018, 18:02

Оқуға 2 мин

Маңғыстау облыстық қоғамдық денсаулық сақтау департаментінің ақпараты бойынша 2017 жылы облыста 363 туберкулез ауруы тіркеліп, соның ішінде көліктегі жұмысшылар арасында, яғни «ҚТЖ» ҰК» АҚ филиалдарына қарасты мекемелерде құрт ауруының 2 дерегі кездескен. Бұл арқаны кеңге салатындай жағдай емес. Өткен жылы теміржолшыларда құрт ауруымен аурушаңдық деңгейі артпаған, бірақ азаймаған да. Салыстырмалы мерзімдегі сан сақталған. Сондықтан Маңғыстау бөлімшелік көліктегі қоғамдық денсаулық сақтау басқармасында туберкулез ауруларына қарсы күрес туралы іс-шара жоспарын жасақтап, қажет жұмыстарды жүргізуде екен. – Анықталған науқастармен қарым-қатынаста болған қызметкерлердің тізімі алынып, олардың 3 жылдық флюорографиялық қорытындыларын қарап шықтық. Және барлық жұмысшылардың уақытылы тексеруден өтуі қадағаланып, флюорографиялық бақылауда болғанына жарты жыл толған жұмысшыларды қайта өткізу жөнінде санитарлық нұсқамалар берілді. Сырқатқа шалдыққан теміржолшылар бүгінде өз орындарында жұмыс жасап жүр. Олар диспансерде қажет ем-домын алып, емделіп шықты, – дейді Маңғыстау бөлімшелік көліктегі қоғамдық денсаулық сақтау басқармасының басшысы Ағзия Темірқасова. Оның айтуынша, басқарма дүниежүзілік туберкулезбен күрес күніне орай тағы да біраз шараларды ұйымдастырыпты. Теміржол мекемелері қызметкерлерінің, әуежай жұмысшыларының медициналық бақылауымен айналысушы мамандармен семинарлар өткізген. Сондай-ақ арнайы дәрістер оқылып, туберкулезден сауықтыру туралы парақшалар таратылған. 2016-2020 жылдарға арналған «Денсаулық» бағдарламасына сәйкес салауатты өмір салтын құру, белгіленбеген жерден темекі тартуға тыйым салу, темір жол, әуе көлігіндегі жұмысшылар арасындағы жұқпалы, жұқпалы емес аурулардың алдын алу және оның мониторингі бойынша ынтымақтастық меморандумына қол қойылған.

Құрт ауруымен күрес

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл