Өнер-білім бар жұрттар...

Жаңалықтар

24.04.2018, 15:45

ҚТЖ саласында өндіріске тиімді жаңалық ұсынған теміржолшылар еңбегін жоғары бағалау дәстүрі қалыптасқан. Әрине, бұл жерде талаптың қатаң екені белгілі. Ең бастысы, салада кәдеге жарайтын тың жаңалықтан түсетін экономикалық тиімділік құны 200 млн теңгеден асуы қажет. Сонда өнертапқыштың еңбегі 5 миллион теңгеге дейін бағалануы мүмкін. «Самұрық-Қазына» қоры компаниялары тобы бойынша, жұмысшылар тарапынан түсетін рационализаторлық ұсыныстардың белсенділігі бойынша «Қазақстан темір жолы» ҰК» АҚ алдыңғы қатардан көрінуде. Ұлттық компанияның филиалдары мен еншілес кәсіпорындарында, теміржолшылардың жаңашылдығын дәлелдеуі мен оларға сыйақы төлеудің бірнеше сатысы түзілген. Бұл дегеніңіз, тасымал үдерісін жетілдіру мақсатында, әріптестер арасында озық тәжірибелер насихатталуда. Айталық, «ҚТЖ» ҰК» АҚ бойынша былтырғы 2017 жылдағы рационализаторлық қызмет көрсеткіштерін байыптар болсақ, өнертапқыштар қатары 1326 адамды құрап, 1167 оңтайлы ұсыныс енгізіліп, тіркелген 1307 еңбектің 3,5%-ы экономикалық пайдасын байқатқан. Өнертапқыштардың 11 пайызы – 30 жасқа дейінгі жастар. «ҚТЖ» компаниясының Бас инженері Батыр Котырев, іс жүзінде тиімділік 448,938 млн теңгені межелегенін айтады. «Өткен жылғы «Көлік саласындағы инновациялар – болашаққа жасалған қадам» тақырыбындағы V рационализаторлар конференциясына Украина темір жолының өкілдері келіп қатысыпты. Онда локомотивтер мен жүк вагондарын жөндеу мен техникалық қызмет көрсету, тасымал үдерісін жетілдіру, жол шаруашылығында еңбек өнімділігін көтеру мен қол еңбегін азайту тұрғысында үздік шешімдер ұсынған теміржолшылар қатары мол болған. Электрмен жабдықтау, автоматика мен телемеханика құрылғыларының сенімділігін арттыру, еңбек ету жағдайын жақсарту, өндірістік жарақаттану деңгейін төмендету сынды мәселелер де қамтылған. 35 қызметкерге «Үздік рационализатор» төсбелгісі табысталыпты. Бас инженер, жаңашыл ұсыныстар байқауының шарты бойынша бірінші орынға 200 мың теңге, екінші орынға 150 мың теңге және үшінші орынға 100 мың теңге берілгенін жеткізді. Конференцияда, тағы 5 автордың еңбегі аталымдардан тыс бағаланып, әрқайсына 50 мың теңгеден ынталандыру сыйлығы тапсырылған. «Жобаның үлкен сомаға лайықтығын сарапшылар бір жыл бойы жан-жақты тексереді. Бұған дейін қомақты сыйақы алғандарға келсек, Астана станциясында үш адамнан құралған рационализаторлар тобы 1,5 млн теңгені еншілеп, 2012 жылы Бас есептеу орталығы жүк жөнелтушілерге вагондарды назарда ұстауға жол ашатын жобасы үшін 3,5 млн теңгеге қол жеткізді. Қазіргі кезде, жылдың аяғына дейін тиімділігі айқындалса, алғаш рет ең жоғарғы дәреже, яғни 5 миллион теңге алуы мүмкін рацұсыныс салмақталып жатыр. Қысқасы, технология қанша қарыштап дамығанмен, мінсіздікте шек жоқ», – деп түйіндеді Батыр Қуанышұлы. Бүгінде елімізде цифрландыру бағытын өзекті десек, ҚТЖ оған да бірінші бетбұрыс жасаған. Бұған дейін қағаз жүзінде қабылданып келген рацұсыныстар қазір «АСУ НТИ» автоматтандырылған жүйесі аясында қаралады. Айтпақшы, ҚТЖ бас инженерінің өзі компанияның инновациялық дамуына елеулі еңбек сіңірген. Оның жаңашыл қызметіне қуат көздерін үнемдеуге байланысты «Жасыл станциясындағы электрлік орталықтандыру бекетіндегі жылыту және желдету жүйелеріне қажет жылу-сорғы қондырғысы», «Радиоарналар ауқымында пойыз қозғалысын арақашықтықтан реттеу жүйесі (СИРДПС)» жобалары арқау болған. Бизнесті жаңғырту бағдарламасы шеңберінде техникалық күтім мен жөндеудің жаңа үлгісіне демеушілік танытып, транзиттік тасымалды өсіру мақсатында жолдың тар тұстарын кеңейту жоспарын жасауға тікелей атсалысқан. Бұл жаңашылдықтар экономикалық тиімділігін баяғыда дәлелдеген, бүгінде өндірісте кеңінен қолданыста.

Өнер-білім бар жұрттар...

Басқа да жаңалықтар

Қазақстан теміржолшысы газеті, №65 18 тамыз 2026 жыл