Тағы бір алып жоба жүзеге аспақ

Жаңалықтар

27.04.2018, 16:37

Ақтөбеде тағы бір алып жоба іске асырылғалы отыр. «KTZ-Express» АҚ өңірде көлік-логистикалық орталығын салуды жоспарлап, техникалық-экономикалық негіздемесі мақұлданып, бүгінде жобалау-сметалық құжаттамаларын әзірлейтін мекеме де анықталған. Ақтөбе облысы – еліміздегі ірі индустриалды аймақтың бірі. Мұнда тау-кен саласы, ірі және орта өңдеу кәсіпорындары қарқынды дамып келеді. Халықаралық теміржол, әуе және автомобиль дәліздері халықаралық дәлізбен байланыс орнатуға мүмкіндік береді. Облыс арқылы трансконтинентальді «Батыс Еуропа – Батыс Қытай» көлік дәлізі өтіп жатыр. Тармақталған жол елдің оңтүстігі мен солтүстігіне, Ресейдің бірқатар өңіріне тура шығады. Қытайдан, Орталық Азия мен Еуропадан келетін тауар ағынын реттеуге де септігін тигізе алады. Бүгінде Ақтөбе өңірінде бірнеше көлік-логистикалық орталық жұмыс істейді. Дегенмен, транзит әлеуетін арттыру мақсатында тағы бір жаңа жоба қолға алынып отырған көрінеді. Аталған орталық өнеркәсіптік және сауда ұйымдарына тасымалдау процесін ұтымды пайдалануға, жүкті кепілді түрде жеткізіп беруге, транзитті жүк ағынын өңдеуге, сонымен бірге тасымалды ұйымдастыру, клиенттің мекенжайы бойынша жүкті рәсімдеу, көлік-логистикалық қызметтерді қамтамасыз етуге мүмкіндік береді. Жүктің салмағын анықтап, буып-түю, белгі соғу, сұрыптау, тиеу, консолидация, деконсолидация, сақтау, бекіту, сақтандыру, кедендік рәсімдеу, тағы басқа қызмет түрлері қарастырылған. Елбасының бес институционалды реформасын жүзеге асыру барысында «KTZ Express» АҚ жоспарлап отырған көлік-логистикалық орталығы Заманауи "А" класты, жалпы ауданы 60 мың шаршы метрді құрамақ. Жүк айналымы жылына шамамен 1 млрд тоннаға жуықтайды. Мұнда көлік және логистика бойынша коммерциялық қызметтердің барлық түрі көрсетіледі, мысалы, кедендік рәсімдеу бір терезе қағидасы бойынша жүргізіледі деп күтілуде. Асқар Ақтілеу, Ақтөбе

Тағы бір алып жоба жүзеге аспақ

Басқа да жаңалықтар

Қазақстан теміржолшысы газеті, №65 18 тамыз 2026 жыл