Жартыжылдық жоспарына сай
Осыған сәйкес, Ақтөбе теміржолшылары еңбек қауіпсіздігін сақтай отырып, пойыздар қозғалысы қауіпсіздігін толық қамтамасыз етіп, директорлар кеңесі бекіткен негізгі көрсеткіштер бойынша қойылған жоспарды толық орындауды көздеп отыр. – Бекітілген жоспарларды орындап қана қоймай, бөлімшенің логистикалық құзыретіндегі даму жұмыстарын жолға қою керек. Бүгінде "ҚТЖ Экспресс" ұлттық мультимодальды көлік-логистикалық орталық құрылысы жобасын жүзеге асырып жатыр. Елбасы тапсырмасына сәйкес, ҚР Үкіметі мен ҚТЖ компаниясы жетекшілігі Жаңа Жібек жолындағы Қазақстанның іскерлік және логистикалық хабын қалыптастыруда барынша әрекет жасап келеді. Ол өз кезегінде өңірлердің де көліктік әлеуетін арттыруға септігін тигізіп жатқаны – қуантарлық жайт, – дейді Ақтөбе жүк тасымалы бөлімшесінің директоры Бөріхан Беркімбаев. Өңірдің бас теміржолшысының хабарлауынша, контейнерлік транзиттік тасымалдау көлемін арттыру динамикасы аясында пойыздардың жылдамдығын жоғарылату көзделген екен. Осыған орай, 2018 жылы Ақтөбе жүк тасымалы бөлімшесінде жүргізілетін күрделі жөндеудің үлесі қомақты екен. Барлығы биыл 52,820 км жолға күрделі жөндеу жұмыстары жүргізілмек. Бүгінде Ақкеспе-Шоқысу өткелінде 15,8 км, сонымен бірге, Шоқысу станциясы мен Ақкеспе разъезінде бірінші негізгі жолды жөндеу жұмыстары аяқталды. – Инфрақұрылымдарды модернизациялау жөніндегі контейнерлік маршруттар көлемінің артуы, жаңа өндірістерді іске қосу, бизнес-модельдерді цифрландыруды жүзеге асыру секілді шаралардың барлығы Мемлекет басшысының «Қазақстанның үшінші жаңғыруы: жаһандық бәсекеге қабілеттілік» жолдауы аясында жүзеге асырылып жатыр, – дейді бөлімшесінің директоры. Сонымен қатар, Бөріхан Сматуллаұлы "Нұрлы жол" мемлекеттік бағдарламасын жүзеге асыру аясында Орталық Азия аумақтық экономикалық ынтымақтастығы дәлізін жалғайтын Ақтөбе-Мақат автомобиль құрылысы мен қайта салу жөнінде жұмыстар басталғанын да айтып өтті. Бұл өз кезегінде аймақта құрылыс материалдарын тиеу қарқынын арттырмақ көрінеді. Жыл соңына дейін 11 083 вагон құрылыс материалы тиеледі деп жоспарланып отыр екен.
Асқар Ақтілеу, Ақтөбе