Көшбасшылық қабілетке ие

Жаңалықтар

18.05.2018, 12:00

Оқуға 2 мин

Бойында көшбасшылық қабілеті басым жанның бірі – Алматы белгі беру және байланыс дистанциясының аға электр механигі, әрі кәсіподақ комитетінің төрағасы Айгүл Естаева десек, қателеспейміз. Мұндай қасиеті мектеп жасынан байқалған кейіпкеріміз қоғамдық жұмыстарға ерте араласып, сыныптастарының бос уақытын тиімді ұйымдастыруды білетін және оның кеңесіне бәрі құлақ асатын. Тіпті өзінен жасы үлкендер де оның айтқандарын жөн санауы – Айгүлдің қазіргі кәсіподақтағы қызметіне келуіне негіз болатын қабілетін танытқандай. Теміржолдағы қызметін 1984 жылы Алматы 1станциясында ЛАЗ электр механигі жұмысынан бастаған ол өсе келе аға электр механик қызметіне көтерілді. Оның тек өз кәсібін жетік меңгерген маман ғана емес, мықты ұйымдастырушылық қабілетін де байқаған әріптестері оны кәсіподақ комитетінің төрағасы етіп сайлайды. Содан бері ол кәсіподақ қызметінің майталманына айналды, заңды, әлеуметтік саланы өте жақсы меңгерген, сонымен қатар еңбек адамымен жұмыс істеу арқылы олардың психологиялық ерекшеліктерін де жақсы ажырата алатын қасиетке де ие. Мұндай қасиеттер, әсіресе, ұжымдық шарт дайындау, маңызды құжаттарды бекіту, өз көзқарасынан айнымай, жұмысшылар құқығы мен ұжым пікірін қорғап шығуда көп көмегін береді екен. – Мен үнемі ұжымнан қолдау табатынымды жолымның болғаны деп санаймын. Бұл белеске жету оңай емес, әрине, көп ізденіп, оқу керек. Тіпті күн сайын оқып, жаңа дүниені үйренуге, тануға тура келеді, – дейді Айгүл. Ол білімін үнемі жетілдіру арқылы біліктілігін алдымен өзіне, сосын ұжымға дәлелдеді. Қызмет барысында конференциялар мен жиындарға қатысып, сонда түрлі пікірталасқа қатысуы, өз мүддесін қорғап шығуы теміржолшыны одан әрі шыңдады. Оның ойынша, кәсіподақ қызметіне адамдарды тарту үшін қашан да адалдық, айқындылық керек. Ал жұмыстың қиындығы – сан алуан пікір мен сан түрлі жағдайы бар жұмысшылардың тілін тауып, олардың ойын жақсы арнаға бұру дейді. Ол бұл қызметтен тек белсенді, азаматтық позициясы айқын азаматтарды ғана көретінін айтады. Өзінің де өмірлік ұстанымы – өмірді сүйіп, бағалау, оны жарқын да әдемі ете түсу. Бос уақытында кейіпкеріміз пэчворк – құрақ мозайкамен айналысып, шығармашылыққа көңіл бөледі.

Көшбасшылық қабілетке ие

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл