Оқушылармен кездесті

Жаңалықтар

29.05.2018, 12:14

Атырауда темір жол бойында жаяу жүргіншілер өтетін арнайы бірнеше аспалы көпір орнатылған. Осындай көпір қала аумағында орналасқан Ақжайық станциясы бойында да бар. Соған қарамастан, жаяу жүргіншілер пойыз астынан өтіп кетуге әуес. Бұл көпірдің қала тұрғындары үшін алар орны ерекше екені де белгілі. Өйткені Сырым Датов көшесі бойындағы Атырау жол бөлімшесі маңындағы үйлер мен темір жолдың арғы бетіндегі Химпоселок ауылы тұрғындары үшін көпір күнделікті жұмысқа, оқуға, басқа да шаруаларына барар қатынас жолы, оларға автобуспен бүкіл қаланы айналып өту тиімсіз. Жаяу да болса осы көпір арқылы, төтесінен өте шыққан әлдеқайда тез. Соның өзінде оқушылар пойыз жолымен өте шығуды қалайды. Соған орай мамыр айының 23-і күні көлік прокуратурасы, ЖІІБ өкілдерінің және Ақжайық станциясының инженері А.Дюсенбаевтың қатысуымен Атырау қаласы, М.Әуезов атындағы №4 мектепте «Темір жол – қауіпті аймақ» темір жолдағы қауіпсіздікті сақтау жөнінде түсіндіру жұмыстары жүргізілді. Келген мамандардың бәрі де сөз алып, темір жол маңының өте қауіпті аймақ екенін, тек тәртіп сақтағанда ғана өмірге нұқсан келмейтінін айтып түсіндірді. – Жаяу жүргіншілер тек көпірден өтуі керек, себебі ол қауіпсіздік үшін қажет, станция бойында маневрлік жұмыстар жүреді, күндіз-түні пойыз қозғалысы толастамайды. Соған қарамастан көпірден өтпей, тұрғындардың рельстен тура өтіп шығам деуі орынсыз. Ақжайық станциясы арқылы Атырау қаласына келетін жүктің басым бөлігі түсіріліп, тиеледі. Бір жағынан, станцияға жапсарлас орналасқан Атырау мұнай өңдеу зауытынан күніне ондаған пойыз шығып-кіреді, мұнай өнімдері тасымалданады. Ал олар өртке қауіпті. Кейбіреулердің шылым шегіп, қалдығын вагонға тастай салатындары да бар, одан өрт шықса, тіптен қауіп. Сол себепті қауіпсіздікті сақтау басты мәселе боп отыр. Тазалықты сақтап, шылым шекпей, арнаулы белгіленген жерден өтсе, бәрімізге тиімді болар еді, – деп оқушыларға ақыл-кеңесін берген Ақжайық станциясының инженері А.Дюсенбаев, балалардың сұрақтарына да жауап берді.

Оқушылармен кездесті

Басқа да жаңалықтар

Қазақстан теміржолшысы газеті, №65 18 тамыз 2026 жыл