Жел жылдамдығын анықтайтын құрылғы

Жаңалықтар

29.05.2018, 12:21

Жамбыл жүк тасымалы бөлімшесінің қызметкерлері Қияқты-Хантау телімінің ПК9 1439-шақырымына «М63М-1» анеморумбометр қондырғысын орнатты. Бұл құрылғы локомотив бригадаларына жел жылдамдығын анық әрі айқын көрсете алады. – Жалпы, бұл телімде бұған дейін де мұндай қондырғы қойылған болатын. Биыл Қияқты-Хантау телімінің ПК9 1439-шақырымына жаңа құрылғы орнаттық. Шу-Шығанақ учаскесінде орнатылған бұл құрылғы Хантау станциясынан Қияқтыға бет алған пойыздардың локомотив бригадаларына анық көрінеді. Және олар әрбір он минут сайын пойыз диспетчеріне хабар беріп, жел жылдамдығын анықтап отырады. Бұл учаскеде жел жылдамдығы қатты, бір жылы контейнерлердің аударылып қалғаны да бар. Енді бұған мейлінше тосқауыл қойылып отыр. Өйткені, Хантау, Қияқты станцияларының қызметкерлері мен Шу-Шығанақ учаскесіндегі пойыз диспетчерлері, Шу локомотив пайдалану депосының локомотив бригадалары, Сарышаған локомотив айналымы депосының Шу-Мойынты аралығында қатынайтын бригадалары құрылғы нұсқаулықтарымен толық танысты. Сондықтан осы бағыттағы пойыз локомотив бригадалары анеморумбометрдегі желдің жылдамдығын диспетчерге және қарсы бағытта келе жатқан пойызға міндетті түрде хабарлау керек. Егер «М63М-1» құрылғысындағы желдің жылдамдығы сағатына 15м/секундты көрсететін болса, ЖТ-Жамбыл бөлімшесі мен Жамбыл магистральдық желі бөлімшесінің диспетчеріне хабар беріп, шаралар қолға алынады. Бұдан кейін пойыз диспетчерлері Қияқты, Хантау станциясының кезекшілеріне бұйрық беріп, ол бұйрық ДУ-58 формасындағы журналға тіркеледі. Осылайша ескерту шаралары жедел қолға алынатын болады, – дейді ЖТ-Жамбыл бөлімшесі директорының бірінші орынбасары Үмітбек Рысбеков. Ал бұл құрылғының уақытында орналасуына және жедел қолға алынуы бойынша жүргізілген жұмыстардың басы қасында ЖТ-Жамбыл бөлімшесінің Шу аймағы бойынша орынбасары Серік Каликов пен Хантау станциясының бастығы Халим Есентай күндіз-түні жүрді. Жалпы, жаңалыққа жаны құмар жамбылдық теміржолшылардың бұл құрылғыны орнатудағы бастамасы өз нәтижесін де беріп отыр. Бүгінгі күні аталған учаскеде қозғалыс қауіпсіздігін еңсеруде жұмыс өз жолына қойылды.

Жел жылдамдығын анықтайтын құрылғы

Басқа да жаңалықтар

Қазақстан теміржолшысы газеті, №65 18 тамыз 2026 жыл