Қызылсайда жұмыс қызған

Жаңалықтар

05.06.2018, 12:45

Шымкенттің шетіндегі Қызылсай станциясы қаладағы өндірістік және ауыл шаруашылық тауардың уақытылы келуі мен жөнелтілуін қамтамасыз етеді. Шағын және орта кәсіптің дамуына үлес қосып жатқан қызылсайлықтар өткен жылдың сәйкес мерзімімен салыстырғанда жүк тиеуді – 137, түсіруді 145 пайызға көбейткен. Қызылсайдағы жүк тасымалын дөңгелетіп отырған – «Стандарт цемент» зауыты. Ай сайын мыңнан аса цемент тиелген вагон ел іші мен шет елге тасымалданады. Сонымен қатар жазда айына 25-26 вагонға тиелетін «Тассай» суы бар. Үшінші – тұрақты түрде айына 50-60 вагонға дейін кондитерлік тәтті тоқаштар, 40 вагондай макарон өнімі тиеледі. Станциядан өткен жылдың 4 айында 4200 вагонға жүк тиелсе, биыл бұл көрсеткіш 5750 вагонды құраған. Яғни, былтырғымен салыстырғанда жүк айналымы 1550 вагонға артқан. Сондай-ақ, өткен жылдың 4 айында 10148 вагон түсірілсе, биыл ол 14768-ге жетіп, көрсеткіш 4620 вагонға жоғарылап отыр. Станцияның еңбек қорғау инженері Алтынай Пірмәтованың айтуынша, теміржолда жұмыс тәртібін сақтап еңбек ете білу де шеберлік. Өткен сәуір айында станция жұмысшылары арасында «Менің жұмыс күнім осылай өтеді» тақырыбында фотоконкурс ұйымдастырылыпты. Байқау қорытындысы бойынша пойыз құрастырушы Т.Кенжеев жұмыс барысында техника қауіпсіздігін бұлжытпай сақтағаны үшін ерекше көзге түсіп марапатталған. Сонымен қатар, 28 сәуір – дүниежүзілік еңбек қорғау күніне орай еңбек қауіпсіздігін қамтамасыз етуге, еңбекті қорғауға және технологиялық тәртіптің нығаюына қосқан үлесі үшін станцияның аға жүк қабылдап-тапсырушысы А.Отарбаев ЖТ Шымкент филиалы директоры Е. Ермановтың Құрмет грамотасымен марапатталған. Сонымен қатар, көктемгі байқау қортындысы бойынша және «Бүкіл әлемдік еңбек қорғау» күніне орай станциялар мен деполар арасында өткен байқауға қатысқан Қызылсай станциясы ІІ жүлделі орынға ие болған.

Қызылсайда жұмыс қызған

Басқа да жаңалықтар

Қазақстан теміржолшысы газеті, №65 18 тамыз 2026 жыл