Әйтеке би: кешеден - бүгінге

Жаңалықтар

15.06.2018, 16:58

Оқуға 3 мин

Әйтеке би станциясының теміржол картасында пайда болғанына салыстырмалы түрде көп бола қойған жоқ. Он бес жыл бұрын тың өлкеде болат жол тартылып, алғашқы теміржол мекемесі пайда бола бастады. Алғашқы кадрлар тартылып, өңірде теміржол жұмысы жанданып, жолаушылар мен жүк пойыздары қатынай бастады. Әйтекеліктерге «Хромтау – Алтынсарин» теміржол тармағының ашылу салтанаты кеше ғана өткен секілді. Міне, содан бергі көзді ашып-жұмғанша 15 жыл өте шығып, бұл өлкеге теміржолшы кәсібі біржолата сіңісіпті. Ақтөбе жүк тасымалы бөлімшесіне қарасты Әйтеке би станциясының тынысы туралы газетімізде аз жазылмады. Жуырда тағы да жолымыз түсіп, станция жұмысымен танысып қайтқан едік. Ислам Ешімұлы – Әйтеке би станциясының бастығы. 1962 жылы дүниеге келген теміржолшылар әулетінің өкілі, Құрметті теміржолшы. 1982 жылы Ақтөбедегі теміржол колледжін бітірген. Содан бері теміржолда әулет кәсібін жалғастырып келеді. «Теміржол енді тартылып жатқан кезде маман ретінде осында шақыртты. Бұрын Ақтөбеде, Жұрын станциясында еңбек еттім. Қандыағашта станция кезекшісі болдым. Қауіпсіздік ревизоры болдым. Әйтеке би станциясына келген соң 2006-2013 жылдар аралығында станция басшысы қызметін атқардым. Кейін бірнеше жыл үзілістен соң биыл қайта келдім, – дейді станция басшысы. Бүгінде станциядағы ахуал тұрақты. Тәулігіне 15-16 жүк пойызы өтеді. Жергілікті жүкке келетін болсақ, бұл өңірден негізінен текше тас тиеледі. Әйтеке би маңында өндірілген құрылыс материалдары еліміздің өзге өңірлеріне вагондармен тоқтаусыз жөнелтіліп жатады. Текшетас жол құрылысына пайдаланылады. Оның ішінде теміржол салғанда да осы тасты төсейді. – Соңғы кезде Құлсары мен Қарабатанға тиеп жатырмыз. Текшетас өндіретін зауыт станциядан 25 км жерде орналасқан. Құрылыс материалдары Ресей бағытына да тиеледі, қысқасы транзиттік жүктен бөлек жергілікті жүк тиелімі де жоспарға сай жүріп жатыр, – деп ақпар берді станция басшысы. Бүгінде станция кезешілері, пойыз құрастырушылар, т.т. барлығы қарамағында 37 адам қызмет етеді екен. Ал жалпы торапта барлық теміржол мекемелерін қосқанда 438 теміржолшы жұмыс істейді. Әйтеке би ауданына көгілдір отын кеш тартылды. Жергілікті халық көмір тұтынып келеді. Сондықтан көмір маусымдық түсірілетін жүк болып саналады. Көмір тасымалы кезінде станциялықтардың жұмысы аса қарбалас болып, күндіз-түні бір тынбайды. Жан-жақтағы жақын ауылдарға да осы станция арқылы тасымалданады. Станция басшысының айтуынша, Әлеуметтік тұрғыда анау айтқан күрделі мәселе жоқ. Биыл медициналық сақтандыру қайта жанданып жатыр. Жұмысшылар ұжымдық шартқа сай әлеуметтік игіліктерді пайдаланып келеді. Қызметкерлердің орташа жасы шамамен 30-35 жасты құрайтын ұжым тату, ауызбіршілікті екенін мақтаныш етеді. «Әйтеке биде теміржолшылар қауымы – үлкен күш. Кез келген мәселе бойынша жергілікті билік бізге сүйенеді. Олармен бірлесіп жұмыстар жасаймыз. Сенбіліктерге шығамыз. Абаттандыру жұмыстарын жүргіземіз. Біраз уақыт бұрын теміржол вокзалы маңынан аллея аштық. Онда түрлі талдар отырғызып, Мұхамеджан Тынышпаевтың ескертіш-тақтасын орнатқан болатынбыз. Бүгінде жергілікті тұрғындар аллеяға келіп, серуен құрып, тынығып отыратын бір орынға айналды », – дейді Ислам Ешімұлы. Биыл ұлттық компания бойынша теміржолшыларға үлестірілетін жолдама саны жылдағыдан әлденешеге артыпты, кезекті еңбек демалысын алған жұмысшылар емдеу-сауықтыру орындарына барып, денсаулықтарын шыңдауда екен. Жазғы каникулда балаларға демалыс лагерлеріне жолдама қарастырылған. – Міне, елу жылда емес, он бес жылдың өзінде жаңарып, адам танымастай өзгерген өңір теміржолдың арқасында осылай дамып жатыр. Әйтеке би станциясы – тарихи жер. Мұнда тәуелсіздік теміржолы атанған «Хромтау-Алтынсарин» магистралінің ашылу салтанаты өтіп, оған Елбасының өзі қатысқанын қариялар немерелеріне ертегідей етіп айтып отырады осы күні, – дейді станция бастығы.

Әйтеке би: кешеден - бүгінге

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл