Қос мерекемен құттықтауда

Осы күндері бүкіл қазақстандықтар Астананың 20 жылдығын тойлап жатса, біздің кейіпкеріміз 60 жылдық мерейтойын атап өтуде. Семей ЖТ қарасты   Ел шығысын Астанамен жалғайтын Жаңа Семей – Дегелең телімінің 242,1 шақырымында орын тепкен Известковый станциясын басқаратын Рысқали Мұстафиновты әріптестері нағыз теміржолдың қара нары деседі.     Ел шығысын Астанамен жалғайтын Жаңа Семей – Дегелең телімі Семей бөлімшесі бойынша ең күрделі аумақ саналады. Осы жолдың  242,1 шақырымында орын тепкен шағын ғана Известковый станциясының да жүгі жеңіл емес. – Біздің станция 5-ші сыныпты. Жақын аралықта іргелі елді мекендер, өндіріс ошақтары жоқ. Сол себепті де бізге жүк тиеу, түсіру сынды күрделі шаруалар жүктелмеген. Әйтсе де, қос тараптан ағылатын пойыздар қауіпсіздігін қамтамасыз етеміз. Кейбір күндері іргедегі Дегелең станциясында көмір тиелімінің артуына байланысты қозғалысты реттеудің маңыздылығы арта түседі. Темір тасқынды қабылдап алып, жөнелтіп, қауіпсіздігін қадағалаудың өзіндік жауапкершілігі зор, – дейді станция бастығы. Қазіргі таңда Известковыйдан тәулігіне 14 жұп пойыз өтеді. Ал, бұл көрсеткіш қатты отын тасымалы артқан күз айларында тіптен еселене түседі. Телімнің қумажолдарының балдық көрсеткішінің жақсы болуы себепті жылдамдық та жоғары. Сол себепті іркіліс туындамауы тиіс. Станция басшысы Рысқали Тілеужанұлының айтуынша, аталмыш станцияда екі-үш жыл жұмыс істеп, кәсіби қызметтің қыр-сырына төселген теміржолшылардың қалың шоғыры бүгінде үлкен станцияларда еңбек етуде. Әсіресе, Аягөз, Локоть, Семей станцияларында тіпті Астанада лауазымды, жауапты қызметте жүрген қызметкерлердің көпшілігі құла дүздегі шағын ғана Известковыйдан шыңдалып шыққанын станциялықтар мақтаныш етеді.   Теміржол саласында 40 жылға жуық еңбек өтілі бар Рысқалы Тілеужанұлы бұл қызметтің қыр-сырына әбден қаныққан, әсіресе станцияда еңбек етудің ыстық-суығын бір кісідей сезінген, тәжірибесі аса мол маман. Алғашқы еңбек жолын ата мекені Суықбұлақ станциясында пойызқұрастырушының көмекшісі болып бастаған еді. Осылайша, осынау станцияның кезекшісі, станция бастығы қызметтерін абыроймен атқарды. Ал, 2001 жылдан бері Дегелең-Семей аралығындағы бесінші класты Известковый станциясында еш үзіліссіз еңбек етіп келеді. Жаңа станцияны ашудағы мақсат – Астана шаһарын бетке алатын жүк және жолаушы тасымалының артуы себепті аталмыш желі бойындағы қозғалыс қауіпсіздігін қамтамасыз ету болатын.   Теміржолдың тарлан қызметкері өзінің 60 жасқа толу сынды мерейлі мезетін Астана шаһарының 20 жылдығымен ұштастыра атап өтуде. Шығысты елордамен жалғайтын желі бойында ұзақ жыл бойы қызмет етіп келе жатқан станция басшысына әріптес аға-інілері қоңырау шалып қос мерекемен қатар құттықтауда.   Қуаныш ҚОЖАЕВ, Семей