Міндеттеріне адал

Теміржол көлігінде тасымалдау үдерісін қамтамасыз етуші мекемелер үшін негізгі маңызды көрсеткіш қозғалыс қауіпсіздігінің сақталуы екені белгілі. Себебі жолаушылар үшін көлік қауіпсіздігі, ал жүк жөнелтушілер үшін жүктерінің барар жеріне бүтін және аман-есен жетуі маңызды.    Маңғыстау пайдалану вагон депосында да пойыздардың қозғалыс қауіпсіздігін қамтамасыз ету басты назарда. Әрбір вагон қараушы өз міндетін жақсы білетіндіктен, қашанда қырағылықты сақтап жұмыс жасауға дағдыланған. – Вагон қараушылардың өте-мөте көңіл бөлетіні, құрамдарға техникалық қызмет көрсету кезінде доңғалақ жұбындағы металдардың ақаулығына, арбашықтарының құйылмалы бөлшектеріне асқан ұқыптылықпен қарайды, – дейді депо басшысы Сәрсенбай Есенқұлов. Жалпы, үстіміздегі жылдың өткен бес айында Маңғыстау пайдалану вагон депосы телімінен барлығы 672267 жүк вагоны, 66800 жолаушы вагоны жүріп өткен. Одан басқа жабық – 8604, жайдақ – 130, жартылай ашық – 10072, өзге де 7138 – барлығы 25944 жүк вагоны тиеуге, 3073 құйылуға берілген. Бұл көрсеткіш өткен жылдан жоғары, жүк ағымының көбеюіне байланысты жылдан-жылға өсуде.   Депо бастығы Ж.Тұрғанбаев, К.Орынбаев, Ы.Сатыбалдиев, Н.Сариев , Б.Битанов, Ж.Исанов, Б.Тыныштықов, И.Елеусінов, А.Есбосынов, Б.Дүйсембаев, С. Көбейсінов сынды вагон қараушылар пойыз қозғалысы қауіпсіздігін қамтамасыз етуге байланысты және вагонның ақауын тапқан қырағылықтары үшін марапатқа ұсынылып, бірақатары  «ҚТЖ» ҰҚ» АҚ басшылығы тарапынан қозғалыс қауіпсіздігі бойынша төсбелгісіне ие болып, тағы бірқатарына бұйрық шығып, марапатын күтіп отырғанын жеткізді. Сәрсенбай Есенқұловтың айтуынша, бұлардың бәрі арты ауыр зардаптарға соқтыруы мүмкін апаттық жағдайлардың алдын алуға септік еткен жұмысшылар екен. Сонымен қатар, вагоншылар ұжымы өздері отырған ғимараттың күтімін де өздері жасап, қысы-жазы жұмысқа ыңғайлы етіп ұстауға тырысады, мұнтаздай таза аулада жазда сая болар талдар мен гүл өсіреді.   Шахизат Сарина