Сауалнама нәтижесі нені көрсетті?

«ҚТЖ»  ҰК» АҚ әлеуметтік шаралар қатарын арттыра түспек. Бұл туралы Ақтөбеге іссапары барысында теміржолшылармен кездескен "Самұрық-Қазына" қоры жанынан құрылған Әлеуметтік өзара ықпалдастық және коммуникация орталығының басқарушы директоры Сандуғаш Ескендірова хабарлады. Оның айтуынша, ұлттық қорға қарасты компаниялардың барлығында жаңа жүйе бойынша жұмысшылардың ұсыныс-тілектері жинақталып, басшылық назарына жеткізіліп отырылады. "Біздің орталық қызметкерлері теміржолшылар арасында сауалнама жүргізді. Компания индексін анықтадық. Қай жерде қауіпті аумақ бар, соны іздедік. "ҚТЖ" ҰК" АҚ Басқарма төрағасы Қанат Алпысбаевтың қабылдауында болып, кадрлық, әлеуметтік саясат бойынша сараптама қорытындысын ұсындық. Компанияға қарасты жүк тасымалы, жолаушылар тасымалы қызметтері, сервис, локомотив шаруашылықтары жұмысы бойынша мәліметтерді компания басшысының назарына жеткіздік. Кей қызметтерде арнайы киім керек, кейбірінде еңбек жағдайын жақсарту керек, т.т. Менің білуімше, компания басшысы жағдайды жақсартуға бағытталған шаралар жоспарын әзірлетті. Тіпті, қомақты қаражат қарастырылып, нақты шаралар қолға алына бастады", – дейді Сандуғаш Ескендірова. Орталықтың басқарушы директорының айтуынша, бүгінде тәуелсіз сарапшылардың қызметіне бірқатар теміржол құрылымдарының басшылары да жүгіне бастаған. Олармен арнайы кездесу өткен. Көбіне-көп басшылық тарапта өз қызметкерлерімен байланыс жетіспей жататын көрінеді. "Жұмысшыларға расымен коммуникация жетпейді екен. Олардың ұсыныс-тілектеріне құлақ асу үшін өңірлерге ұлттық компанияның экономистері мен қаржыгерлерден құралған мобильді топ барып, сөйлесіп, ұсыныс-телектерін тыңдаған. Бүгінде ұлттық компания басшылығы да мұндай ұсыныс-тілектерді аяқсыз қалдырмауға тырысуда. Айта кету керек, "Самұрық-Қазына" қорына қарасты өзге компанияларда мұндай тәжірибе бұрыннан бар. "ҚТЖ" компаниясында енді қолға алына бастаған бастама ең алдымен жұмысшылар игілігі үшін жасалады", – деген Сандуғаш Ескендірованың айтуынша, әлеуметке бетбұрыс оң нәтиже берген. Асқар Ақтілеу, Ақтөбе