Арыста қозғалыс ашылды
Арыс қаласында орын алған төтенше жағдайға байланысты уақытша жабылған Арыс станциясында бас жолдар қозғалыс үшін ашылды. Сарыағаш, Шымкент және Түркістан бағыттары бойынша жүк және жолаушы пойыздарын қабылдау және жөнелту жүргізіле бастады.
Оқиға орын алған жерде кешеден бері жұмыс істеген жергілікті теміржолшылар, Шымкент магистральдық желі дирекциясының басшылығымен жол дистанциясы, байланыс және белгі беру, электрмен жабдықтау дистанциясының жұмысшылары тәулік бойы станция жолдарының қираған-бүлінген жерлерін жөндеп, қалпына келтіру жұмыстарын жүргізді. Нәтижесінде оқ-дәріден тазартылып, тексеріліп, байланыс желісіне кернеу берілген соң Арыс-Талдықұдық – жұп жолында , ШағырТалдықұдық – тақ жолында, Қалаш-Арыс-2 – жұп және тақ жолдарында, Ақдала-Арыс-2 – жұп жолында пойыздар қатынасы үшін қозғалыс ашылды.
Арыс станциясы тек басты жолдармен жүру үшін ашық. Сұрыптау және қабылдап-жөнелту жолдары қозғалыс үшін әлі жабық. Оқиға орнында қалпына келтіру және жөндеу жұмыстарымен айналысып жүрген жергілікті теміржолшылар жұмысын басшылық жасап жүрген Шымкент магистральдық желі бөлімшесінің бастығы Марат Оңаловпен телефонмен тілдесіп, қосымша ақпарат алуға тырыстық. Арыс станциясы арқылы қозғалыс қалпына келтіріліп, қазірше бас жолдармен пойыздар жіберіле бастағанын растаған ол инфрақұрылымның едәуір бөлігі зақымданғанын жоққа шығармады.
«Дегенмен, Арыстағы жол дистанциясы, белгі беру және байланыс, электрмен жабдықтау дистанцияларының тәжірибелі теміржолшы мамандарының күшімен аз уақытта барлық ақауды жойып, жолды толықтай қалпына келтіруге қол жеткіздік. Рахмет жігіттерге!», – деді Марат Әденұлы.
26 маусымнан 27 маусымға қараған түнінің өзінде Арыс станциясы бойынша 23 пойыз өткізілді, оның ішінде 7 жолаушы, 8 контейнерлік, 8 жүк пойызы бар. Қазіргі уақытта пойыздарды кестеге енгізу бойынша барлық қажетті шаралар қабылдануда.