Өңір жастарымен кездесті

Ақтөбеге жұмыс сапарымен барған сенат төрағасы Дариға Назарбаева өңір жастарымен кездесті. Олардың қатарында белсенді жас теміржолшылар да болды. 

Дариға Нұрсұлтанқызы мемлекеттік жастар саясатындағы рухани-мәдени құндылықтарға, еңбексүйгіштікке, жауапкершілікке, ұрпақ сабақтастығына, отбасылық тәрбиенің басымдылығына және жастардың білім алуға ұмтылуына басымдық берді. «Егер сен жақсы жұмыс жасасаң, жақсы табыс табасың. Мен сіздердің барлығыңыздың жақсы басшылық қызметке ұмтылғандарыңызды қалар едім. Ол үшін үлкен білім қажет. Біз үнемі өзімізді жетілдіріп отыруымыз керек», – деді сенат төрағасы жастармен кездесуінде.

Басқосуда жастар да сөз алып, өз ойларымен бөлісті. Ақтөбе ЖТ бөлімшесінде басшылық қызметтердің бірінде жүрген жас теміржолшы қоғамдық өмірге белсене қатысып жүрген әріптестері туралы сөз қозғап, компаниядағы жастар ұйымының жұмысы туралы айтып берді. «Компаниядағы жастар ұйымы туралы айтқым келеді. Өңірде 5 мыңға жуық жас теміржолшы бар. Жаңалыққа жаны құмар, ізденімпаз жастар үшін жоба көп. Жастар форумында рационализаторлар өз ұсынысын ортаға салып, тың идеяларымен бөліседі. Еңбек жоғары бағаланады. Сонымен қатар, бөлімшеде «Жайдарман» ойындарына қатысатын командамыз бар. Жастарымызды ынталандыру үшін әртүрлі шаралар өткізіп тұрамыз. Салауатты өмір салтын сақтауға арналған спорттық жарыстар тығыз қарымқатынас орнатып отыр. Тұрмысы төмен, аз қамтылған отбасыларға жастардың бастамасымен көмектер көрсетіліп келеді. Теміржолшылар үшін биылғы Жастар жылы түрлі жобалар мен жетістіктерге толы болды. Сонымен қатар, бұдан басқа кейбір күрделі мәселелер де жоқ емес. Статистикаға сүйенсек, өткен жылы 42 адам жұмыстан шыққан. Оның дені жастар. Бұл – теміржолдан басқа салаларға да қатысты жағдай. Сондықтан, білікті мамандарды жұмыстан жоғалтпау жағын қарастыру жолын іздеу керек деп ойлаймын», – деді Ақтөбе ЖТ мекемесі техникалық бөлім басшысының орынбасары Руслан Жұмағалиев.

Теміржолшының жүйелі ойына риза болған сенатор оның сөзіне қол соғып, құрмет көрсетті. «Жарайсың! Талдап, жүйелі түрде түсініріп бердің.

Жастар алға ұмтыла беру керек, мемлекет сіздерге сенім артады. Жастар – кез келген мемлекеттің ең белсенді бөлігі, қоғамның қоғаушы күші. Сондықтан ел тірегі сендер екенін әсте естен шығармағандарың абзал», – деген жастардың ой-пікірін тыңдап, ел дамуына үлестерін қосып, белгілі бір іспен айналысуға шақырды.