Сервис сапасы жақсара түсті
«Қазақстан теміржолшысы» газетінің тілшісі
Қазақстанда жолаушылар пойыздарын сапалы қызметпен қамтамасыз етуде «Жолаушылар тасымалы» АҚ тазалық пен жоғары сервиске негізделген жұмыстар атқаруда. Компаниядағы сервистік қызмет көрсетуді жақсарту жобалары шеңберінде вагондарды жабдықтаудың жаңа стандарттары қабылданғаны мәлім.
Атап айтқанда, вагондарды жұмсақ алынбалы инвентарьмен жабдықтау жұмыстары өткен жылы қараша айынан жүргізіле бастады. Жолаушылар содан бері жаңа төсек-орын жабдықтарын сапасына қарай бағалап та үлгерді. Ал биыл вагондардың санитарлық-гигиеналық жағдайын тиісті деңгейге көтеру үшін вагон салондарының ішкі тазалығына және олардың санитарлық-гигиеналық құралдармен жабдықталуына қатысты талаптар қайта қарастырылды.
Сондай-ақ жолаушыларға сервистік қызмет көрсету сапасын арттыру бойынша шараларға жолаушылар вагондарын жаңғырту жатады. 2021 жылдың 1 тоқсаны аяқталғанға дейін ұлттық тасымалдаушы 500-ден астам вагонның 1000-нан астам санитарлық тораптарын ауыстырмақ. Бұл стандартты үлгідегі вагондардың санитарлық-техникалық жағдайын жақсартып, олардың жолаушылар үшін барынша жайлы болуына, эстетикалық келбетінің артуына мүмкіндік береді.
Жолаушылар вагондары үшін санитарлық модульдердің каркасын дайындау барысында санитарлық талаптар мен стандарттарға сай келетін жаңа заманның беріктігі жоғары және жанбайтын материалдары пайдаланылады.
Қолданылатын материалдар жемірлік зияндылығы бар жуу құралдарының әсеріне төзімді, ең төмен және ең жоғары ауа температурасында пайдалануға жарамды.
Санитарлық модульдің ішінде қол жуатын хауызы, сенсорлық араластырғыш, желдеткіш, су ағызатын құбыр қатып қалған жағдайда деп қойылған жылыту жүйелері, сонымен қатар дезинфекция үшін және ағын ауаны зарарсыздандыру құрылғылары бар.
Модульде қозғалыс және түтін датчигі, 220V розетка да қарастырылған. Унитаздың механизмдік құрастырылымы бойынша ішіндегі қалдықты ағызған кезде унитаз отырғышы да бірге арқалыққа автоматты түрде көтеріліп, бұл оның санитарлық-эпидемиологиялық сапасын арттыра түседі. Қызыл және жасыл түсті жарық индикаторы жолаушыларға кабинаның ішінде адам бар-жоғынан хабар береді.
Компания дамуының перспективалы жоспарында темір жол көлігі қозғалысын ең экологиялық таза көлік түріне айналдыру мақсаты кіреді. Сондай-ақ қоршаған ортаны қорғау саясатын жетілдіру, қоқысты бөлек жинау жүйесін енгізу, биоәжетханасы бар жаңа вагондар алу да алдағы уақытта жоспарда қарастырылып отырған жұмыстар.