Вагондарды беру-жинау үдерісінің Тәртібі қабылданды
«Қазақстан теміржолшысы» газетінің тілшісі
Теміржолдағы жүк тасымалында сыбайлас жемқорлықпен тиімді күрес жүргізу мәселелері «ҚТЖ-Жүк тасымалы» ЖШС бас директоры Владимир Петровтың төрағалығымен өткен онлайн отырыста талқыланды. Барлық жол бөлімшелерінің басшылары, «Адал жол» жобалық кеңсесінің өкілдері қатысқан отырыс барысында сыбайлас жемқорлық белгілері кіреберіс жолдарда вагондар жинау және беру бойынша қызмет көрсету кезінде көрініс беретіні айтылды. Бұл жағдайды болдырмас үшін «ҚТЖ-Жүк тасымалы» ЖШС-де вагондарды беру-жинау үдерісінің Тәртібі қабылданды. Аталған құжат вагондарды беру-жинау тәртібін айқын және ашық етеді, кезек белгіленеді және сыбайлас жемқорлыққа апаратын әрекеттер жойылады. Сонымен қатар жүк жөнелтушілер тарапынан өтінімдерді жоспарлау және келісу үдерістері, тасымал құжаттарын ресімдеу, жүк тасымалы үшін төлемдер рәсімдері айқындала түсті. «Коммерциялық және келісімшарттық жұмыстардың автоматтандырылған жүйесіндегі (ККЖ АБЖ) «Клиенттің жеке кабинеті» жүк жөнелтушіге өтінімдерді өткізу, олармен келісу немесе бас тарту тәртібін қадағалауға мүмкіндік береді», деп түсіндірді Владимир Петров. ККЖ АБЖ (АСУ ДКР) темір жолдағы клиенттер үшін ыңғайлы, олардың уақытын үнемдейді, станция қызметкерлерімен өзара қарым-қатынас жасауын болдырмайды, жұмыстың тиімділігі мен жеделділігін арттырады. Құқықтық мәселелер жөніндегі атқарушы директор Ілияс Ерназаров Қазақстан кәсіпкерлері мен қызмет бе- рушілері қауымдастығының ішкі сыбайлас жемқорлық тәуекелдерін талдау бойынша өкілдерінің қатысуымен құрылған жұмыс тобының жұмыс нәтижелері туралы баяндады. Ол сондай-ақ «ҚТЖ-Жүк тасымалы» ЖШС-де 2021-2022 жылдарға арналған сыбайлас жемқорлыққа қарсы шаралар Жоспары жүзеге асырылатынын атап айтты. Соның шеңберінде түсетін өтініш-шағымдарға сыбайлас жемқорлық бойынша мониторинг жүргізіледі, мүдделер қақтығысы реттеледі, тасымал үдерісін цифр- ландыру бойынша жобалар енгізіледі. Сыбайлас жемқорлыққа қарсы тиімді жұмысты ұйымдастырып, «ҚТЖ-Жүк тасымалы» ЖШС-нің барлық филиалдарында жалпы үйлестіруді қамтамасыз ету үшін сыбайлас жемқорлық бойынша құқық бұзушылықтың алдын алуға жауаптылар тағайындалды. Олардың басты міндеті – жүк тасымалы саласында пара беруге әкелетін себептер мен жағдайларды жою, темір жолдағы клиенттердің заңды мүдделерін қорғау. Жиын қорытындысында Владимир Петров сыбайлас жемқорлыққа қарсы талдау жүргізуді және «жіңішке өңеш- терді», яғни әрбір құрылымдық бөлімшелердегі сыбайлас жемқорлық бойынша осал телімдерді табуды тапсырды.