Он станцияда өткел салынбақ

«ҚТЖ-Жүк тасымалы» ЖШС-да теміржолдағы жарақаттанушылықтың алдын алу бойынша өткен кеңейтілген мәжілісте жыл басынан бері 11 рет адам басу оқиғасы орын алғаны белгілі болды. Жолда болатын қайғылы жағдайларға көбіне белгіленбеген жерден өту себеп болады. «ҚТЖ-Жүк тасымалы» ЖШС бөгде адамдардың станция жолдарына шығуын болдырмау бойынша шаралар жоспарын жүзеге асыруда. Көлік прокуратурасы, полиция, ҚР ИИДМ көліктік бақылаудың аумақтық органдары, БАҚ өкілдерін тарту арқылы Үйлестіру кеңесінің 71-отырысы өткізілді. Теміржолға жақын орналасқан елді мекендердің 14 мыңнан астам тұрғынын қатыстыра отырып мыңдаған кездесулер ұйымдастырылып, оларға теміржолдан өту қауіптілігі мен ережелері түсіндірілді. «Темір жол – қауіптілігі жоғары аймақ» тақырыбындағы қауіпсіздік сабақтары 237 оқу орнының 9,8 мың оқушысына өткізілді. Теміржолда рұқсат етілмеген, бірақ адамдар жаппай өтетін жерлерде мыңдаған рейдтер өткізілді.Теміржолдың күшімен соңғы 4 жылда 54 шағын станцияда жаяу жүргіншілер төсемі салынды. 2021 жылы 10 станцияда жаяу жүргіншілер өткелін салу жоспарланып отыр. 25 станция мен жалпы ұзындығы 207 км 2 перегонда жолға бөгде адамдардың шығуына қарсы қоршаулар қойылды. Ай сайын өтпе жолдар мен жүргіншілер көпірінің, жаяу жүргіншілер жолдарының жолаушылар платформаларының техникалық жағдайы тексеріліп отырады. Темір жолда қауіпті білдіретін 237 ескерту белгісі орнатылып, 281 белгі жаңартылды.

«Темір жолдан өту ережелерін мұқият сақтаңыздар. Әр адам теміржол көлігі нысандарында жүргенде тек рұқсат етілген жерден ғана өтуі керек, яғни тоннельдер, көпірлер, өткелдер, жол өтпелерінен өту қажет. Уақытымды үнемдеймін немесе осы маған қолайлы екен деп теміржолды кез келген жерден кесіп өтуге болмайды. Өз өміріңізге өзіңіз қауіп төндірмеңіз», – деді «ҚТЖ-Жүк тасымалы» ЖШС бас директорының орынбасары Қанат Көбесов.