Контейнерлік тасымалға көшу үшін Қазақстан мен Ресей «Агроэкспресс» сервисін қолданбақ

Қазақстан мен Ресей теміржолының басшылары әріптестік және іскерлік қарым- қатынастарды дамыта түсуге ықпал ететін бірқатар келісімдерге қол жеткізді. Нәтижесінде екі ел арасында теміржол көлігімен жүк тасымалының 80% астамы цифрлық форматта ресімделетін болады және ауыл шаруашылығы өнімдерін контейнерлік пойыздармен тасымалдау туралы келісім жасалды. «ҚТЖ» ҰК» АҚ басқарма төрағасы Нұрлан Сауранбаев пен «РЖД» ААҚ бас директоры – басқарма төрағасы Олег Белозёров екі ел Үкімет басшыларының кездесуі аясында қағазсыз технология бойынша жүктер мен вагондарды тасымалдауға көшуді жандандыру жөніндегі жол картасына қол қойды. Құжат екі жақты да, транзиттік қатынаста да қағазсыз технологияларды одан әрі тарату бойынша жүк жөнелтушілермен және жүк алушылармен бірлескен жұмысты көздейді. Осы технология бойынша электрондық жүк құжаттарын пайдалана отырып, Қазақстаннан жүктерді Ресей мен Беларусь арқылы транзитпен үшінші елдерге тәжірибелік экспорттық тасымалдауды жүзеге асыру жоспарлануда. Жол картасының іс-шараларын іске асыру 2022 жылға қарай Қазақстан мен Ресей арасындағы қағазсыз технология бойынша жүктер мен бос вагондарды тасымалдау деңгейін 80% дейін, ЕАЭО мүше-елдер арасындағы транзиттік тасымалдау кезінде 50% дейін арттырады. Сонымен қатар, Ресеймен екі елдің ауыл шаруашылығы өнімдерін контейнерлік пойыздармен тасымалдау туралы да келісілді. «ҚТЖ» ҰК» АҚ мен «РЖД» ААҚ контейнерлік пойыздармен агроөнеркәсіптік өнімді жедел жеткізуді көздейтін мамандандырылған «Агроэкспресс» сервисін ұйымдастыру және дамыту бойынша ынтымақтастық туралы меморандумға қол қойды. Құжатқа «ҚТЖ» ҰК» АҚ басқарма төрағасы Нұрлан Сауранбаев пен «РЖД» ААҚ бас директоры – басқарма төрағасы Олег Белозёров қол қойды. Тараптар мамандандырылған «Агроэкспресс» сервисі үшін тиімді тарифтік мөлшерлемелер қалыптастыру мәселелерін пысықтауға келісті. Сондай-ақ теміржолшылар агро- өнеркәсіп өнімдерінің жүк базасын пысықтап, бекітуге, пойыздардың нақты бағыттары мен жүру кестесін белгілеуге ниетті.