Құрық портының әлеуетін арттыратын станция құрылысы биыл аяқталады

Құрық портына қызмет көрсететін, бес жыл бұрын ашылған «Құрық порты» станциясы уақыт өткен сайын дамып жатыр. Алдағы уақытта мұнда тағы бір станция ашылады деп көзделіп отыр. Құрылысы 2019 жылы басталған порт алды станциясы осы жылдың соңына дейін бітеді деп жоспарлануда, деп хабарлайды Rail-news.kz. Қосымша сегіз жолы бар порт алды станция іске қосылған кезде негізгі «Құрық порты» станциясының мүмкіндіктері бүгінгіден күшейе түспек. Мәселен, станциялықтар қазірде паромнан түсірілген жүк вагондарын қанша көлемде болса да келгенін келгендей жіберуде. Егер жаңа станция ашылса, жинақтап, көбірек вагон жіберуге мүмкіндік тумақ.

«Қазір паромнан 36 вагон түсірілсе, тек соның өзін ғана тепловозға тіркеп, Маңғыстау станциясына жөнелтеміз. 36 вагон бір құрамға аз. Ал жаңа станция жолдарына 72 вагон сыятын болады. Сонда осы жерден құрамды толықтырып жіберсек, Маңғыстау станциясына тоқтамай-ақ, әрі қарай тіке кетуіне мүмкіндік туады. Уақыт та, қаражат та үнемделеді», – дейді Құрық порты станциясының бастығы Қанат Айтбайұлы.

Бұдан бөлек, қазір мұнда астық терминалы салынуда екен. 2023 жылы іске қосылуы жоспарланып отырған терминал порттыкі болғанмен, келетін вагондарға қызмет көрсетуші станция болмақ. Вагондарды тұйыққа қою, беру сияқты жұмыстарды атқаратын да, әрине, теміржолшылар. Бұл терминал жұмысын бастаса, жүк ағынын көбейтіп, станция көрсеткіштеріне оң ықпал етері сөзсіз деседі жергілікті теміржол басшылары. Құрық порты: теміржол мен теңіз жолы түйіскен жер