Күрделі жөндеуден өткен Тараз теміржол вокзалы заманауи келбетке ие болды
Тараз теміржол вокзалының бас ғимаратын қайта жаңғырту жұмыстары аяқталды. Жамбыл облысының әкімі Бердібек Сапарбаев теміржол вокзалында болып, атқарылған жұмыстарға жоғары баға берді.
Бұл нысан 1986 жылы салынған, соңғы рет жөндеу жұмыстары 2013 жылы жүргізілген болатын. Осы жолы теміржол вокзалы ғимаратын қайта жаңғырту жұмыстарына жергілікті қазынадан 237,0 миллион теңге қаржы жұмсалған.
Мердігер компания - «Энергетикалық Құрылыс» ЖШС ауқымды жұмыстар атқарғаны көрініп тұр. Екі қабатты ғимараттың шатыры, қасбеті жаңартылып, терезелері мен есіктері заманауи материалдардан жаңадан орнатылған. Су құбыры, кәріз және жылу жүйелері де ауыстырылған.
Ғимараттың уақыт талабына сай жобасы Жамбыл облыстық сәулет және қала құрылысы басқармасының құжаттарымен бекітілген. Жергілікті сәулетшілер ғимараттың қабырғаларын көркем суреттермен безендірген. Сондай-ақ, жаңа билет кассалары орнатылған. Вокзал заманауи бейне-бақылау жүйесімен жабдықталған, нысанда барлығы 74 бақылау камерасы бар.
«Теміржол вокзалы біздің облыс орталығының қақпасы болып табылады. Мұнда тұрғындар мен қонақтарға ыңғайлы болу үшін барлық жағдайлар жасалуы керек, келушілер өздерін қауіпсіз сезінуі тиіс. Жоғары деңгейде қызмет көрсетілуі қажет. Сондықтан да біз қаржы бөліп, сол үдеден шығуға мүмкіндік жасадық», - деп атап өтті аймақ басшысы Бердібек Машбекұлы.
Ал Жамбыл жүк тасымалы бөлімшесі директорының уақытша міндетін атқарушы Дүйсенбек Сыдықов жаңғырту жұмыстарының өз деңгейінде қолға алынғанын жеткізді. Барлық шаралар теміржол саласының қағидаттарына сай орындалған. Қазіргі таңда Тараз вокзалы тұрғындар мен қонақтарға, жолаушыларға кідіріссіз, толық қызмет көрсетіп жатыр.
Облыс басшысы енді вокзал аумағын абаттандыру жұмыстарын жүргізуді тапсырды.