Аптап ыстыққа байланысты пойыздар жылдамдығы шектеледі
Ауа температурасы жоғарылаған кезде локомотив бригадаларына пойыздарды ерекше жағдайда басқаруға нұсқау беріледі. Осыған орай «Қазақстан темір жолы» ҰК» АҚ республика бойынша аптап ыстық ауа райы байқалған аймақтарда барлық пойыздардың жылдамдығын шектеу режимін енгізді.
Нақтырақ айтқанда, өткен және осы аптада еліміздің солтүстік және шығыс өңірлерінде ауа температурасы + 40°С-қа дейін көтерілсе, оңтүстік және батыс аймағында +45° С-қа дейін жетті. Тіпті кейбір аудандарда елуге жеткен көрінеді. Мамандардың айтуынша, мұндай жағдайда рельстер + 58°С – 62°С-қа дейін қызады да, оның үстімен зулаған жылжымалы құрамға қауіп төндіреді. Сол себепті пойыздар қозғалысы қауіпсіздігін қамтамасыз ету үшін ҚТЖ тарапынан жылдамдыққа шек қою енгізіліп отыр. Жолаушы пойыздарының соңғы кезде межелі станцияларға кешігіп келуінің де себебі осы. Компания келтірілген ыңғайсыздықтар үшін жолаушылардан кешірім сұрайды.