Жаңа жолаушылар вагондарын сатып алу бойынша тиісті шаралар қабылдануда
2025 жылдан бастап 537 бірлік көлемінде Stadler вагондарын жеткізу жоспарлануда. Бұл туралы Көлік комитеті төрағасының орынбасары Нүркенов Қайриден «Ашық сағат алаңында» айтты, деп хабарлайды Rail-news.kz.
ҚР Индустрия және инфрақұрылымдық даму министрлігіндегі «Ашық сағат алаңына» жолаушылар тасымалы өкілдері, операторлар және вагон өндірушілері жолаушылар вагондарын жаңарту әрі теміржол кластерін құру мәселесін талқылады. Комитет төрағасының орынбасары жолаушылар вагондарының техникалық жағдайына назар аударды.
«Бүгінгі таңда жаңа вагондар сатып алу бойынша тиісті шаралар қабылдануда. Биыл 62 «Тальго» вагоны сатып алынды. Жылдың соңына дейін тағы 11 вагон жеткізіледі деп күтілуде. 2025 жылдан бастап 537 бірлік көлемінде Stadler вагондарын жеткізу жоспарлануда», – деді Қ.Нұркенов.
Айта кетерлігі, бүгінде жолаушылар вагондарының жалпы паркі 2600-ден астам бірлікті құрайды. Субсидиялау шарты негізінде вагондар паркін 10 жыл ішінде кемінде 15%-ға жаңарту көзделген. Өз кезегінде Комитет төрағасының орынбасары жаңарту үлесін 25 пайызға дейін арттыру қажеттігін атап өтті.