ҚТЖ пойыздарымен 484 мыңнан астам бала тасымалданды
Балалар күні қарсаңында «Жолаушылар тасымалы» АҚ кәмелетке толмаған жолаушылардың тасымалына қатысты статистиканы жариялады. 2025 жылдың басынан бастап компания пойыздарымен 484 мыңнан астам бала тасымалданған, деп хабарлайды Rail-news.kz.
Сұранысы жоғары бағыттар қатарында Астана–Алматы, Астана–Шымкент, Алматы–Шымкент, Астана–Семей және Алматы–Семей бағыттары көш бастап тұр.
Балаларды теміржол көлігімен тасымалдау төмендегі ережелер бойынша жүзеге асырылады:
● 7 жасқа дейінгі бір бала ата-анасымен немесе заңды өкілімен бірге жеке орынсыз тегін жол жүреді;
● егер бірнеше бала болса, тек біреуінің жол жүруі тегін, ал қалғандарына балалар билеті қажет;
● 7 мен 15 жас аралығындағы жолаушылар үшін 50% жеңілдікпен балалар билеті сатып алынады;
● 15 жастан асқан балалар өз бетінше сапар шеге алады, бірақ міндетті түрде нотариалды расталған ата-ананың немесе заңды өкілінің келісімі болуы тиіс.
Сонымен қатар, пойыздарда балаларға арналған бейне және аудиоконтентпен жабдықталған мультимедиялық жүйелер орнатылған. Ал мейрамхана-вагондарда бүлдіршіндерге лайықталған мәзір ұсынылады.
«Жолаушылар тасымалы» АҚ жас жолаушыларға жайлы сапар сыйлау мақсатында қызмет сапасын жетілдіру мен қосымша мүмкіндіктерді енгізуді жалғастырады.