Қауіпсіздікті сақтауға үлес қосқан теміржолшылар марапатталды

«ҚТЖ» ҰК» АҚ Бас инженері Рамазан Садырқұлов Дүниежүзілік еңбек қорғау күніне орай аса қауіпті саналатын салада адал еңбек етіп, қауіпсіздіктің сақталуына өз үлесін қосып жүрген азаматтарды марапаттады.

Еңбек қорғау күнін қорытындылаған жиында «Қазкөліккәсіп» ҚБ ұйымдастырушылық, кадрлық, ақпараттық және халықаралық жұмыстар жөніндегі бас менеджері Амангелді Төреғожин қатысып, сөз сөйледі. Бас инженердің қолынан бірінші болып «Кәсібі бойынша үздік» атағын алған Жамбыл вагон пайдалану депосының вагон қараушы-жөндеушісі Нұржан Жанкиев болды. Ол «Қауіпсіз емес жұмысты тоқтату құқығын пайдаланғаны үшін» марапатталып отыр. «Ерлігі үшін» төсбелгісіне «Жолаушылар тасымалы» АҚ «Батыс» өңірлік филиалы жолаушылар вагондарының жолсерігі Ғалия Қабдрахманова «дәрігер келгенге дейін дер кезінде көрсетілген көмегі үшін» ие болды. Ол биыл қаңтар айында пойызда жүкті жолаушы әйелді босандырып алған болатын. Ал «Адал еңбегі үшін» белгісімен Еңбек қауіпсіздігі және экология инспекциясы өндірістік қауіпсіздік бойынша менеджер Ілияс Бейсенов марапатталса, «Үздік маман» белгісін әскерилендірілген күзет қызметінің өндірістік қауіпсіздікті ұйымдастыру жөніндегі бас менеджері Серік Мырзашев иеленді.  

Сонымен қатар «ҚТЖ» ҰК» АҚ Басқарма төрағасының Құрмет грамотасы Жаңа Семей станциясының және Шелек электрмен жабдықтау дистанциясының еңбек қорғау және қауіпсіздік жөніндегі жетекші инженер-технологтары Айжан Ботаханова мен Алмагүл Байғалиеваға берілді. Компания басшысының Алғыс хаты Сексеуіл локомотив пайдалану депосының өндірістік қауіпсіздік және экология жөніндегі сектор бастығы Байғабыл Кенжеғараев пен Жіңішке станциясының және Аягөз жол дистанциясының еңбек қорғау және техника қауіпсіздігі жөніндегі инженерлері Айнұр Әбілберікова мен Дүйсен Сатылғановқа табысталды.  

Компанияда соңғы 4 жылда «Өндірістік қауіпсіздіктің біріктірілген жүйесі» бірегей қосымшасы жұмыс істеп келеді. Оны компанияның 105 мыңнан астам қызметкері пайдаланады. Осы қосымша арқылы анықталған 9 үздік қызметкер Басқарма төрағасының Алғыс хаты мен 6 АЕК көлеміндегі сыйақыға ие болды. Олар «Қауіпсіздіктің мінез-құлық диалогы» жүйесі бойынша үздік нәтиже көрсеткен. Одан әрі «Адал еңбегі үшін» төсбелгісіне қоса 40 АЕК сыйақымен ҚТЖ Жол диагностикалау орталығы Алматы филиалының ақаутабу цехының шебері Қуаныш Станбеков марапатталды.  

Ал атаулы күннің ең басты сыйы – құны 4 млн теңге тұратын шетелге туристік жолдама Қостанай вагон пайдалану депосы Құсмұрын ТҚКҚ бастығы Владимир Оксқа берілді. 2023 жыл бойына ол 106 Қауіпсіздіктің мінез-құлық диалогы бойынша деректерді тіркеген. Оның барлығы уақытында орындалып, кем-кетік жойылды. Осылайша ол талай адамның, әріптесінің өмірін сақтап қалды.