Жас теміржолшы халықаралық байқау жеңімпазы атанды

ҚТЖ-ның «Жас темір» бағдарламасы арқылы Астана станциясының пойыз қабылдаушысы Бейбарыс Елеусізов «ХХІ ғасыр көшбасшысы» халықаралық байқауының жеңімпазы атанды. Оның жұмысы барлық талапқа сай деп танылып, жастар саясатының дамуына қосқан үлесі және қоғамдық істерге белсенді атсалысқаны үшін жүлделі марапатқа ие болды.

Байқауды «Жаңа Қазақстан» республикалық инновациялық орталығымен бірге «Bilim-orkenieti» ұлттық инновациялық ғылыми-зерттеу орталығы ұйымдастырды. Ұлытау облысы Жезқазған өңірінің тумасы Бейбарыстың «Жас темір» бағдарламасы бойынша теміржолда жұмыс істеп жүргеніне алты ай болыпты.  

– Жастар саясатын жүзеге асырумен 2019 жылдан бері айналысып келемін. Былтыр Халықаралық гуманитарлық көлік университетін тәмамдап, осы бағдарламаға өтініш беріп өткен едім. Содан бері Астана станциясында пойыздар қабылдаушысы болып еңбек етіп келемін. Студент кезімнен қоғамдық істерге белсенді араласамын. Аманат партиясы «Жастар қанатының» белсенді мүшесімін. Сайлау науқандары кезіндегі жұмыстарға, «Таза Қазақстан» акциясына белсене қатыстым. Волонтерлік жұмыстармен де өте көп айналысамын. Осы іс-шараларға қатысқаным туралы сертификаттарым мен марапаттарымды аталған байқауға ұсындым. Халықаралық байқауда жеңімпаз атанам деп ойлаған жоқпын әрине, дегенмен өте қуаныштымын. Бұл жерде сертификаттарыңның бәріне нақты дәлелдер керек болды. Сол талаптардың бәріне сай жұмыстарымды лайықты деп бағалады, – дейді Бейбарыс Ержанұлы.  

Бейбарыстың ата-анасының бірі металлург болса, бірі фабрикада жұмыс істейді, яғни нағыз еңбек адамдарының әулетінде тәрбие алған.  

– «Жас темір» бағдарламасы 1,5 жылдық жоба. Жоба біткеннен кейін де жұмысымды осында жалғастыра беремін. Менің міндетіме – вагондардың сақталуы мен жеткізілуін қамтамасыз етіп, оның құжаттары мен барлық талаптарға сай екеніне көз жеткізіп қабылдау, келесі станцияларға бүтін дұрыс күйде жеткізуді қадағалау кіреді. Жұмысым өзіме ұнайды, – дейді жас теміржолшы.