Теміржолшы талай жанды аман алып қалды
Маңғыстау облысы бойынша меншікті тілші
Жуырда Ақтау қаласындағы көпқабатты үйлердің біріндегі пәтерден өрт шықты. Әп-сәтте қара түтінге оранған үйдің ішінде көмекке мұқтаж болып шарасыз қалған жандарға алғаш көмекке жеткендердің бірі теміржолшы жігіт еді.
Өрт шыққан үйге өрт сөндірушілерден бұрын кіріп, қызыл жалынмен алысып жүріп адамдарды құтқарғандардың қатарынан табылған Маңғыстау локомотив пайдалану депосының тепловоз машинисі Нұрым Аманов көршілердің үйі өртеніп жатыр дегенді естіген сәтте-ақ оқиға орнынан табылып, тілсіз жаумен күреске кіріскен.
– Өрт шыққан үйге жеткенде кіреберіс қара түтін, іште анасы мен жеткіншек қызы қалғаны белгілі болды. Жанын шүберекке түйген екеуі не үйден шыға алмай, не өртті сөндіре алмай шарасыз халде еді. Сонымен қатар көршілес пәтерде де үрей құшағында қалған адамдар бар. Біз алдымен сол адамдарды пәтерден сыртқа алып шығып, сосын өртті сөндіруге кірістік. Абырой болғанда бәрі аман, ешкім зардап шеккен жоқ. Өрт сөндіру қызметі келгенше қызыл жалынды сөндіріп те үлгердік, – дейді мамандығын бір сәтке өрт сөндіруші, құтқарушы қызметіне ауыстырған теміржолшы.
Ол Маңғыстау теміржолындағы еңбек жолын 2007 жылы слесарлықтан бастаған. Бір жылдан соң Тараз қаласындағы оқу орталығында білімін жетілдіріп, төрт жыл машинист көмекшісі болды. 2012 жылы Ақтөбеде машинист дайындайтын курстан өтіп, тепловоз тізгіндеді. Қазір Маңғыстау – Сайөтес, Маңғыстау – Жаңаөзен бағытында жүк пойызын жүргізеді. Құдай қосқан қосағымен бірге екі қыз, бір ұл тәрбиелеп отыр.
Сын сағаты туғанда өз жанын ойламай, өзгені құтқаруға ұмтылған Нұрым Амановтың ерлігін депо басшылығы ескерусіз қалдырмады. Маңғыстау локомотив пайдалану депосының ұжымы және кәсіподақ комитеті атынан адам өмірін құтқарып, азаматтық борышын атқару кезіндегі батылдығы үшін Құрмет грамотасымен және бағалы сыйлықпен марапаттады.