Апаттың алдын алған машинист «Ерлігі үшін» медалімен марапатталды
«Қазақстан теміржолшысы» газетінің тілшісі
Бейбіт күннің батырлары ортамызда жүр. Олар кәсіби біліктілігінің арқасында адамдар өмірін сақтап, апаттардың алдын алуда. Солардың бірі Тараз локомотив пайдалану депосының 2-класты машинисі Марат Абызов. Ол жолаушылар пойызын жүргізіп келе жатып дұрыс кәсіби әрекет етуінің арқасында өткелде тұрып қалған тракторды соқпай, апаттың алдын алды.
Оқиға жайлы газетіміздің өткен бір санында жазған болатынбыз. Ал кешегі аптада машинист лайықты марапатқа ие болып, «Ерлігі үшін» медалін төсіне тақты.
Қысқаша тоқтала кетсек, оқиға биыл 7 маусымда Тараз – Шу телімінің 3731-шақырымын күзетілмейтін өткелде болған. Көмекшісі Бағдан Ермековпен бірге №34 Ақтөбе-Алматы пойызын жүргізіп келе жатқан Марат Сәрсенбайұлы өткел бағдаршамы қызыл жанып тұрса да, өтуге асыққан тракторды алыстан аңғарды. Алайда тура жолдың ортасына келгенде трактордың тіркемесі ағытылып, тұрып қалды. Мұны байқаған Марат дереу жылдамдықты азайтып, оны сағатына 63 км-ге дейін түсірді. Соның арқасында ол өткелге 2 метр қалғанда пойызды тоқтатып үлгерді.
– Бұл жерде жағдай әр секундқа тәуелді болды, мәселен, жылдамдықты 63-ке емес, 64-65 км-ге де түсіргенде өткелдегі тележкаға соқтығысу мүмкін еді. Жоғарғы орында жатқан адамдар құлап, электровозға да зақым келетін еді. Алайда біз оған жол бермедік. Өткелде нұсқаулыққа сай әрекет етіп, 4 минуттан соң межелі бағытқа қарай жүріп кеттік. Жалпы мұндай жағдай 12 жылдық тәжірибемде бірінші рет болып тұр. Осы еңбегімізді бағалап жатқан компания басшылығына алғысымыз шексіз, – дейді машинист жігіт.
Марат Абызов 1989 жылы Жамбыл облысы Жуалы ауданында туып-өскен. Машинист болу – бала күнгі арманы. Алғаш рет досының көз тартарлық форма киіп жүретін машинист ағасын көріп, бұл мамандыққа деген қызығушылығы оянып, машинист болуға шешім қабылдайды. 2012 жылы локомотив шаруашылығы бойынша жоғары білім алып, еңбек жолын Тараз депосында машинист көмекшісі болып бастайды. 5 жылдан соң білімін жетілдіріп, машинистікке көтерілді. 2023 жылы Астанада оқып екінші класты машинист дәрежесін алған соң жолаушылар пойызын жүргізу құрметіне ие болды.
Оның ерлікпен пара-пар әрекетін жоғары бағалаған «ҚТЖ-Жүк тасымалы» ЖШС директорының локомотив шаруашылығы бойынша орынбасары Асан Үмбетов осындай мықты мамандар еңбек ететін Тараз локомотив пайдалану депосына білікті кадрлар дайындаудағы еңбектері үшін алғыс айтты.
P.S Жамбыл облысындағы тілшіміз «ҚТЖ – Жүк тасымалы» ЖШС Жамбыл филиалының директоры Айдын Сеитбенбетов бастаған тараздық теміржолшылар Астанадан марапат алып оралған машинист Марат Абызовты әуежайдан зор салтанатпен күтіп алғанын хабарлайды.
Әулиеата әуежайында бейбіт күннің батырын күтіп алған көпшілік машинистке зор қошемет көрсетіп, өнерлі жас жеткіншектер күмбірлетіп күй шертсе, әріптестері ізгі тілектерін жеткізді.
Мемлекет басшысы Қасым-Жомарт Тоқаев Астанадағы жолаушы вагондарын шығаратын зауытта болып, «Жұмысшы мамандықтар жылы» аясында жаңа салалық марапаттарға ие болған үздік қызметкерлермен кездескен болатын. Осы кездесуге жолаушылар пойызын апаттан аман алып қалған жамбылдық машинист те куә болып, Президентпен суретке түсу бақытына ие болды.