100 маман іріктелді

ҚТЖ-да «Мамандықтар көшбасшылары» корпоративтік даму бағдарламасы бойынша оқытудың бірінші модулінің ашылуы өтті. Оған «ҚТЖ-Жүк тасымалы» ЖШС директорының корпоративтік мәселелер жөніндегі орынбасары Марал Марасилов қатысып, сөз сөйледі.

2022–2024 жылдары компания өндірістік қауіпсіздікті және жеке іскерлік қасиеттерді арттыруға бағытталған корпоративтік бағдарлама бойынша өңірлік және желілік деңгейдегі 700-ге жуық қызметкерді оқытты. Олардың арасынан анағұрлым белсенді мамандар, яғни шеберлер, нұсқаушылар, бас инженерлер мен қозғалыс қауіпсіздігі жөніндегі ревизорлар, вагон шаруашылығындағы ТҚКҚ, ЭЧ, ПЧ, ШЧ мекемелерінің бастықтарын қосқанда ең үздік деген 100 маман іріктеліп алынды.  

«ҚТЖ» ҰК» АҚ Адами ресурстарды басқару департаментінің HR-бизнес серіктесі Алма Сәулебаеваның айтуынша, «Мамандықтар көшбасшылары» пулын құру қызметкерлерді ынталандыру және еңбек тиімділігін арттыруға бағытталған. Жоба басқару ой қабілетін, көңілкүй икемділігін және төтенше жағдайдағы мәселелерді шешуде командалық өзара іс-қимыл машықтарын дамытуға және жаңа технологияларды енгізуге бағытталған. Модуль шеңберінде қауіпсіздік департаментінің мамандары қатысушыларды мәселелерді жүйелі талдауға, операциялық қауіпсіздік саласында шешімдер қабылдауға үйретеді.  

– Жоба арқылы саланы дамытуға қабілетті көшбасшылардың кадрлық резерві қалыптастырылады. Іріктеу кезеңі өте қатал түрде өтті, әрбір үміткердің деңгейі, еңбегі жіті тексеріліп, қаралды. Тест тапсырды, әңгімелесу кезеңінен өтті, дауысқа салынды. Бұл дегеніңіз қазір мұнда компанияның өндірістік саладағы ең бір мықтылары жиналып отыр деген сөз. Біз оларды өз ішімізде әзілдеп «спецназ» деп атаймыз. Олар нағыз өз ісінің кәсіби мамандары. Қандай қауіпті жағдай туындаса да, біз осы мамандарды жұмылдырып, өзекті мәселенің шешімін табуға тартамыз. Оларды оқытуға ішкі және сырттан елге және шетелдерде сұранысқа ие тренинг жаттықтырушыларды шақырттық, – деді Алма Сәулебаева.  

Персоналды дамыту – компанияның тұрақтылығы мен бәсекеге қабілеттілігіне салынған инвестиция. Оқу нәтижесінде үздік қатысушылар серіктес-компанияларда тағылымдамадан өтіп, MBA, Mini MBA және магистратура, докторантура бағдарламалары бойынша оқытылады.  

- Биыл іріктеліп шыққан орта буын басшылардан 100 қызметкер бүгін аталған бағдарлама бойынша модульдік оқуды бастадық. Бағдарлама үш модульден тұрады. Бүгінгі біріншісі оффлайн, екіншісі онлайн түрде өтеді, сосын үшіншісінде арнайы тапсырмамен жоба беріледі, соны қорғаймыз. Жалпы бұл болашақта компанияда білікті басшы кадрларды дайындау мақсатында жүзеге асырылуда. Бұл топқа іріктелу оңай болмады, білім мен біліктіліктің арқасында өттік, өте қуаныштымын, алған білімімізді ҚТЖ-ны дамыту жолындағы игі мақсатқа жұмсаймыз, - дейді қатысушылардың бірі, Маңғыстау ШЧ-10 Жаңаөзен-Болашақ телімінің бастығы Мұхтар Көжекбаев.