Қызылордада бір әулеттен төрт машинист шыққан

Қызылорда локомотив пайдалану депосының машинисі Әлібек Сейткамалов теміржолшылар әулетінің өкілі екенін, бір әулеттен төрт машинист шыққанын мақтан тұтады. Қызылорда қаласында әулеттің негізін қалаған Сағидолла қарияның қара шаңырағында 1967 жылы дүниеге келген Әлібек атакәсіпті абыроймен жалғастырып келеді. – 1987 жылы әскер қатарынан оралып, осы Қызылорда депосының құрылыс цехына жұмысшы болып жұмысқа орналасқаннан кейін осы деподағы машинист көмекшілерін дайындау курсында оқыдым. Сол жылы оқуға қабылданған 30 баланың жартысына жуығы жауапкершіліктен қашқақтап оқуды тастап кетті, мен болашақ мамандығымды бала кезден армандаған соң машинист болмай қоймаймын деп шештім. Шын мәнінде, тепловоз машинисі болу үшін ең бірінші мамандыққа деген құштарлық пен жауапкершілік, өзіңе сенімділік керек, бұл кез келген маманның бойынан табылуы тиіс талап болғанмен, бұл салада жауапкершілік пен сенімнің орны ерекше саналады. Әкем Сағидолла да біздің құлағымызға осыны құйып өсірді, – дейді Әлібек Сейткамалов. Депо машинистерінің жұмысы ол кезде ауыр болғаны белгілі. Ол уақытта депода тасымалға қолданылатын өз араларында «машка», «вишка», «луганка», «тройка» атап кеткен тепловоздар ауыр болды, жұмыстың басым бөлігі механикалық түрде қолмен атқарылатын. Ал, қазір заман талабына сай жабдықталған «эволюшндер» келгелі бері жұмыс, әрине, анағұрлым жеңілдеген, дегенмен жауапкершілікке қойылатын талап күшейген. Тасымал процесінде қауіпсіздікті сақтауды арттыру әр теміржолшының басты қағидасы болғандықтан машинистке жүктелетін талаптың бәсі де жоғары болмағы белгілі. – Әлібектің ағалары Гена мен Юра да осы де- пода машинист болып зейнетке шыққан. Қазір ағасы Алик екеуі – депоның үлгілі де тәжірибелі машинистері. Әлібек Сағидоллаұлы өзіне тапсырылған жұмысын тиянақты атқаратын тәжірибелі, теориялық тұрғыдан білімді, кәсіби міндетін сауатты жүргізетін, инструкциялық талаптарды мүлтіксіз орындайтын жауапкершілігі жоғары машинист, жыл басынан бері 1215 кг дизель отынын үнемдеп, өзгелерге үлгі көрсетті, – деді депоның кадр бөлімінің басшысы Шарида Әбдіреева.