Бейнеу ауданында жаңа спорт кешені салынады: Әкімдік пен кәсіподақ өзара меморандумға қол қойды
Маңғыстау облысы Бейнеу ауданының әкімі Рахымжан Шалбаев пен «Қазақстан теміржол, автомобиль, әуе және су көлігі қызметкерлерінің салалық кәсіподағы» қоғамдық бірлестігінің төраға орынбасары Ғафу Несіпбаев ынтымақтастық туралы меморандумға қол қойды. Бұл теміржолшылар мен олардың отбасылары және Бейнеу ауылының тұрғындары үшін дене шынықтыру-сауықтыру бағытындағы жұмысты дамытуға арналған, деп хабарлайды Rail-news.kz.
Аталған құжат аясында Бейнеу ауылында жабық спорт кешені салынады. Жаңа нысан теміржол саласы қызметкерлеріне, олардың отбасы мүшелеріне және ауыл тұрғындарына қолжетімді болып, бұқаралық спортпен айналысуға жағдай жасайды.
«Біздің мақсат – аудан тұрғындары мен теміржол кәсіпорындары қызметкерлеріне қолайлы орта қалыптастыру. Салынатын спорттық кешен адамдардың денсаулығын нығайтып, отбасымен бірге уақыт өткізуіне мүмкіндік береді, сондай-ақ ауылдағы спорттық салтты көтеруге ықпал етеді», – деді Бейнеу ауданының әкімі Рахымжан Шалбаев.
Кәсіподақ төрағасының орынбасары Ғафу Несіпбаев теміржолшылардың еңбек құқықтарын қорғаумен бірге, олардың әлеуметтік әл-ауқатын жақсарту да маңызды екеніне тоқталды.
«Спортқа салынған инвестиция – бұл теміржолшылардың болашағына салынған инвестиция. Соңғы жылдары Кәсіподақ Атырау, Көкшетау, Екібастұз, Мақат, Павлодар, Орал және Ақтөбе қалаларында спорт алаңдарын қаржыландырып салды. Бұқаралық спорт пен салауатты өмір салтын қалыптастырудағы жұмысты әрі қарай жалғастырамыз», – деп атап өтті ол.
Меморандумға сәйкес, әкімдік жаңа нысанға жер телімін бөліп, құрылысы аяқталған соң спорт кешенін балансқа қабылдайды және оның толыққанды жұмыс істеуі мен күтімін қамтамасыз етеді. Ал кәсіподақ спорттық ғимараттың құрылысын өз қаржысы есебінен жүргізіп, кейін әкімдікке тапсырады.
Әлеуметтік инфрақұрылымды дамыту бағытындағы бұл қадам Бейнеу ауданында спорттық белсенділікті арттыруға, түрлі жарыстар мен мәдени-спорттық шараларды ұйымдастыруға жағдай жасайтыны сөзсіз. Кешен теміржолшылардың ғана емес, бүкіл аудан тұрғындарының басын біріктіретін, салауатты өмір салтын дәріптейтін маңызды орталыққа айналмақ.