Техникалық сабақтың арқасында сақтық шаралары артты
Ақтөбе облысы бойынша меншікті тілші
Ақтөбе станциясында қозғалыс қауіпсіздігімен тікелей байланыста еңбек ететін 30-ға жуық маман үшін кезекті техникалық сабақ өтті. Жол бойындағы қауіпсіздік тақырыбын теориялық тұрғыда талдаған дәріс қозғалысшылар үшін тиімді болғаны анық.
Себебі, қауіп-қатері басым өндірісті жұмыс орнында қауіпсіздікті сақтау, сақтық шаралары күнделікті қимыл-қозғалыста ескерусіз қалып жататыны жасырын емес. Ал арнайы өтетін техсабақтарда ол тақырып теориялық тұрғыда жан-жақты талданып, сауатты әрекет ету, ширақ қимылдау ережелері егжей-тегжейлі түсіндіріледі. Бұл адам санасының қабылдауына жағымды әсер ететіні және сақталып қалатыны айтылады.
Техсабақ Ақтөбе станциясы басшысының техникалық жұмыстар бойынша орынбасары Арман Құрманиязовтың жүргізуімен өтті. Дәріс барысында техникалық процесс кезіндегі өзгерістер талқыланып, басты ұстаным қызметкерлердің жеке бас қауіпсіздігі екендігі айтылды.
«Мұндай сабақтар айына төрт рет болады. Қозғалыс қауіпсіздігі бойынша тақырыптары бекітілген арнайы жоспар бар. Әр айдың басында және соңында екі реттен 80 минут өтеді. Биылдыққа қауіпсіздіктің бұзылу оқиғасы болған жоқ. Бұл бүгінгідей дәрістердің нәтижесі деп білемін», – дейді Арман Құрманиязов.
Техникалық сабақ әр тоқсанда жоспар бойынша өтеді. Оған станция кезекшілерінен бастап пойыз құрастырушыға дейін қауіпсіздікке жауапты қызметкерлер түгел қатысады.
– Станцияда техникалық сабақтар сейсенбі, бейсенбі күндері айына 4 рет өтеді. Сабаққа барлық қызметкерлердің қатысуы қамтылады. Тек түнгі кезектен шыққандар демалуға жіберіледі. Сондықтан бір тақырып екі күн талқыланады. Бұл – түнгі кезекте болып, сабаққа қатыса алмаған теміржолшылар үшін жасалған жағдай. Ал практикалық сабақтарда сыртта бағыттамалармен жұмыс өтеді. Қандай бөліктерден тұрады, қалай өлшейді, қозғалыс кезіндегі ақауды табу, жіті бақылау, бұрамаларды бұрауға дейін көрсетіледі. Практикалық сабақ жоспарына сай алдағы күндері, мысалы, биыл қысқа жаңадан кіретін жас мамандарға арнайы сабақ өтеді. Жолда қар тазалаудың да өзінің тәртібі болады. Қалай тазалау керек, орны қалай қоршалады. Кімге ескерту керектігі, тағысын тағы жан-жақты түсіндіріледі, – дейді Ақтөбе станциясының инженер-технологы Айнұр Ақжанова.