Балаларға темір жол қауіпсіздігі бойынша дәріс оқылды
Теміржол бойы кімге болса да қауіпті. Тоқтаусыз зулаған алып пойыздар жолына көлденең тұрған ешкімді аямай басып жаншып өте шығады. Сондықтан теміржолшылар мен желілік полиция тұрғындарды оның қауіп-қатерінен сақтандырудан кенде болып жатқан жоқ.
Желілік полиция өкілдерін алаңдататын жайт – әсіресе балалардың қауіпсіздігі. Өкінішке орай, ата-ананың қарауынсыз қалып, жол бойында ойнаған, өтем деп байқаусызда пойыз астына түсіп қалған балалар аз емес. Осыған байланысты 1-9 қыркүйекте өткен «Абайлаңыз, пойыз!» акциясын сайөтестік полиция толық балаларға арнады.
Сай-Өтес станциясындағы желілік полиция бөлімшесінің қызметкерлері науқан барысында Сай-Өтес ауылындағы орта мектебіне келіп, оқушылар мен мұғалімдерге профилактикалық түсінік жұмыстарын жүргізді.
– Мектептегі кездесу кезінде оқушыларға темір жол қауіпті аймаққа жататындықтан одан өтерде жаяу жүргіншілерге арналған жолмен ғана ереже сақтап өтіп, аса сақ болу керегін түсіндіруге тырыстық. Сондай-ақ, темір жол өткелінің, бағдаршамның қызметі қандай, ондағы белгілердің мағынасы, шлагбаумның орналасуы, өткел кезекшісінің нұсқауы сияқты ескеруге тиісті басты қағидалардан дәріс оқыдық. Теміржолдың белгіленбеген жерінен өткені үшін әкімшілік шараға тартылатындығы туралы да ескерттік, – дейді Сай-Өтес станциясындағы желілік полиция бөлімшесінің бастығы Нұрлыбек Рахметов.
Нұршаһ АЛЫМҚЫЗЫ, Сай-Өтес станциясы