Маңғыстаулық вагон қараушылар қауіптің бетін қайтарды

Маңғыстаулық екі бірдей вагон қараушы жақында вагонның бүйірлік рамасындағы ақауды анықтап, қозғалыс қауіпсіздігіне төнген қауіптің алдын алды. Екі ақау да қазақстандық жүк вагондарынан табылды.

Вагондарға техника лық қызмет көрсету пунктінің вагон қараушы-жөндеушілері Маңғыстау станциясына келіп тоқтаған жүк пойызын тексеру кезінде анықтаған ақаулар вагон шаруашылығының «бас ауруына» айналған бүйірлік рамадан күндізгі ауысымда анықталып отыр. Маңғыстау станциясындағы ТҚКП вагон қараушысы Жасұлан Елеусіновтің назарына іліккен ақау №3 жолға келіп тоқтаған №3605 жүк пойызының №70509039 вагонында кездесті. 2019 жылдың қараша айында деполық жөндеуден өткен екен. Екіншісін №6 жолда №3603 жүк пойызына техникалық қызмет көрсету кезінде аға вагон қараушы-жөндеуші Назархан Сариев №29024635 вагоннан тапты. Былтыр ғана деполық жөндеуден өткен вагонда осындай күрделі ақаудың анықталуы – сын көтермейтін жағдай.  

– Бізде 2002 жылдан бері еңбек етіп келе жатқан, жалпы 40 жылдық еңбек өтілі бар Назархан Сариев бүйірлік рамадан тереңдігі 9 мм, диаметрі 3 мм болатын жарықты анықтады. Ал Жасұлан Елеусінов 16 жылдан бері еңбек етеді. Оның анықтағаны – бүйірлік рамадан тереңдігі 2,5 мм болатын саңылау ақауы. Екі «ауру» вагон да әрине дереу құрамнан ағытылып, жөндеуге жіберілді, – дейді бұл туралы Маңғыстау станциясындағы техникалық қызмет көрсету пунктінің вагон паркінің сақталуы жөніндегі маманы Амандық Көшкімбаев.  

Өз жұмысына ұқыптылықпен қарап, қырағылық тынытқан вагон қараушыға мекеме басшылығы алғыс айтып, марапатқа ұсыну жөнінде ұсыныс берген.