Теміржол қысқы жағдайда жұмыс істеуге дайын
«ҚТЖ» ҰК» АҚ-да компанияның филиалдары мен құрылымдық бөлімшелері басшыларының қатысуымен қысқы кезеңде шаруашылықтар мен кадрларды жұмысқа дайындау бойынша кеңейтілген кеңес өтті. Қыс мезгіліне дайындық бойынша іс-шаралардың орындалуы туралы еншілес ұйымдар басшылары баяндады, деп хабарлайды Rail-news.kz.
Темір жолда алдағы суықты айларға дайындық маусымда басталды. Барлық желілік бөлімшелер бойынша теміржолшылар арнайы киіммен және аяқ киіммен, жеке қорғану құралдарымен қамтамасыз етіледі. Қыста магистральда бірінші рет жұмыс істейтін қызметкерлерді оқытуға басымдық беріледі. Арнайы оқытудан 5822 «алғашқықыстық» өтті. Олардың әрқайсысы тәжірибелі тәлімгерге бекітілген.
Қысқы кезеңде тұрақты жұмысты қамтамасыз ету үшін негізгі және станциялық жолдардың, бағыттамалық бұрмалардың, көпірлер мен құбырлардың техникалық жай-күйі, диспетчерлік орталықтандыру, байланыс желісі, электрмен жабдықтау желілері, тартқыш қосалқы станциялар тексерілді. Қар қар тазалау және қардан аршу техникасының орналасатын жері анықталды. Орналастыру қыс мезгілінде қарлы учаскелерді ескере отырып жүзеге асырылды.
Сонымен қатар 461 қазандық дайындалып, 84 км жылу трассасы жөнделді. Вокзал ғимараттарының жылыту жүйелерін жөндеу, сығымдау және жуу жұмыстары орындалды. Теміржолшылардың тұрмыстық және техникалық қажеттіліктері үшін қатты отын жеткізілді.
Күзгі комиссиялық тексеру кезінде локомотив паркінің Теміржол көлігін техникалық пайдалану ережелерінің талаптарына сәйкестігі бағаланды. Қысқы жұмыс режиміне солтүстік өңірде жолаушылар вагондары мен электр пойыздары ауыстырылды. 15 қарашаға дейін оңтүстік өңірде жылжымалы құрамды дайындау жұмыстары аяқталады.
Алдағы қыста электр жылжымалы құрамдағы байланыс сымның мұздануымен күресу үшін қажетті 19 вибропантограф дайындалды.