Семей станциясында әкімшілік құқық бұзған 61 тұлға ұсталды
Абай облысы бойынша меншікті тілші
Жуырда Семей станциясындағы желілік полиция қызметкерлері «Құқықтық тәртіп» атты профилактикалық іс-шара өткізді. Осыған байланысты жеке құрам қызметкерлері күшейтілген жұмыс тәртібіне көшіп, жұмыс штабы құрылды.
Топтарға бөлініп іс жүргізген тәртіп сақшылары әсіресе теміржол вокзалы, вокзал перрондары, теміржол өткелдері сынды қоғамдық орындарды ерекше назарға алды. Басты мақсат қоғамдық тәртіпті сақтай отырып, түрлі құқықбұзушылықтың алдын алу болды.
Іс-шара кезінде желілік тәртіп сақшылары әртүрлі әкімшілік құқық бұзған 61 тұлғаны ұстады. Қоғамдық орында алкогольдік ішімдік ішкені үшін 10 адам жауапқа тартылды. Сондай-ақ, кәмелеттік жасқа толмағандардың жалғыз жүруі, өзге де тәртіп бұзушылықтар тіркелген.
Сонымен қатар, осы іс-шара аясында Семей ЖТ бөлімшесіне қарасты мекемелермен бірлесіп темір жолға жақын орналасқан, ұлттық компания теңгеріміндегі қараусыз қалған үйлерге акт толтыра отырып, 6 мәрте аралау жұмыстары ұйымдастырылды Сондай-ақ экстремизмге қарсы іс-қимыл аясында сырт келбеті күдік тудырған жеті азаматпен профилактикалық сұхбат жүргізілген.
– Аталған іс-шара нәтижесінде есірткі заттарын, заңсыз қаруды сақтау, психотроптық заттарды қолдану сияқты қылмыстардың алды алынып, қоғамдық орындардың тыныштығы сақталды, – дейді Семей станциясындағы ЖПб-нің әкімшілік полиция бөлімінің бастығы, полиция капитаны Рүстем Абеуов.
Айтуынша, іздестіруде жүрген бір қылмыскер анықталған және Семей станциясы желілік полиция бөлімінің криминалистикалық желісі бойынша 6 адамның саусақ іздері алынып, фото-видео есепке қойылыпты.