Қарғын су: теміржолшылар күшейтілген режимде жұмыс істеді
Түркістан облысы бойынша меншікті тілші
Өткен аптада Түркістан облысының аумағында жауын-шашын әдеттегіден мол түсті. Тәулік бойы жауған ақ жауыннан соң сай-сала мен арық-атыз суға толып, өңір теміржолшылары күшейтілген режимде жұмыс істеді.
Облыстың бірқатар аймақтарында су тасқыны орын алып, Арыс, Сарыағаш аудандары мен Сырдария өзеніне жақын орналасқан теміржол телімдеріне де қарғын судан төнер қауіп аз болмады. Келеңсіздіктің алдын алу мақсатында Арыс жол дистанциясы мамандарынан құралған арнайы топ Сарыағаш пен Арыс жол дистанциясының аралығын шарлап, Монтайтас пен Шеңгелдіде орналасқан теміржол мекемелерін сүзіп шықты.
«Шымкент магистральдық желі бөлімшесінің арнайы тапсырмасына орай, елді мекендер мен жол учаскелерін араладық. Ақтас ауылындағы 2 қораны су басқаны болмаса, аймақта айтарлықтай қауіп төнбеді. Мұның бәрі тасқынның алдын алу шараларын көктем-күзде тиянақты жүргізгеннің нәтижесі деу керек», – дейді дистанцияның кәсіподақ өкілі Есен Жұмағалиұлы.
Айтуынша, Монтайтас ауылы маңындағы тесік көпір мен аспалы көпірдің жиегінде ағын су әдеттегіден әлдеқайда жоғары болған. Ал Талдықұдық пен Шағыр айналымының 3 229-шы шақырымындағы 8-пикетте су деңгейі көтеріліп барып қайта түскен. Облыстың таулы аймағында орналасқан теміржол мекемелері де өткен аптада күшейтілген режимде жұмыс істеді. Қаңтардың басында қалың түскен қар жаңбыр суымен еріп, су шаю қаупі жоғарылаған.
«Өткен аптада қауіп артып, тәулік бойы ауысымдық кезеңмен жұмыс істедік», – дейді Түлкібас жол дистанциясының бас инженері Нұрлан Спанбекұлы.
Дәл қазіргі күні өңірде тасқын қаупі сейілген, еріген қар-су алдын ала дайындалған арық-атыздармен ағып кеткен.