Ақтөбеде машинистер шұғыл тежеуді биыл 4 рет қолданған
Ақтөбе облысы бойынша меншікті тілші
Ақтөбеде биылғы жылдың алғашқы айының өзінде жолға бөгде адамдардың шығып кетуі салдарынан машинистер 4 рет шұғыл тежеу қолданып, пойызды тоқтатуға мәжбүр болған.
Пойыздар қозғалысының қауіпсіздігін қамтамасыз ету мақсатында Ақтөбе станциясы ұжымы «қауіпті аймақтарда» рейд жұмыстарын ұйымдастырды. Өткен аптада станция басшысы мен орынбасары, әскерилендірілген күзет пен желілік полиция өкілдерінен құралған топ жылжымалы құрамды шұғыл тоқтату оқиғасы жиі тіркелетін өткелге рейд жасады. Сельмаш ауданындағы көпір астынан темір жол өтеді. Шойын жолдың екі жағында халық тығыз орналасқан. Және бұл – темір жол қаланы қақ ортасынан кесіп өтетін тұс. Сол себепті ескі қала мен мөлтек ауданды байланыстырып тұрған көпір аумағында жүргінші көп. Көпірді айналып өтуді қиынсынғандар қоршауды бұзып, өздеріне ыңғайлы тұстан жол салып алған.
«Темір жол бойындағы қоршауларды сындырып тастайтындар көп. Жол дистанциясының жолшылары осы жердегі сынған қоршауларды бірнеше қайтара жөндеді. Өткен жылы 27 рет пойызды шұғыл тежеу болса, биылғы бір айда 4 рет қайталанып отыр. Былтыр қоршауды алып тастаған тұстан өтпек болған 82 жастағы қала тұрғыны қайтыс болды. Егде жастағы қария пойызды байқамай қалған, дабыл дауысын естімеген», – дейді Ақтөбе станциясының басшысы Нұрлан Ермағамбетов.
Әскерилендірілген күзет және көлік полициясы азаматтарға темір жолдан өту ережелерін тағы да түсіндіріп, мұқият болу керектігін ескертті. Тек қана арнайы жабдықталған жерлерден, өткелдерден өтудің адам өмірі үшін маңыздылығын түсіндірді.
«Жазатайым оқиғалардың негізгі себептері – азаматтардың белгіленбеген жерлерде темір жолды кесіп өтуі. Өкінішке орай адамдар теміржолдың қаншалықты қауіпті аймақ екендігін, оның зардаптарын басына түспей жете түсінбейді, ескермейді. Шұғыл тежеу фактілері де азаяр емес. Қатты жылдамдықпен келе жатқан жүк және жолаушылар пойыздарының адамды қағып кету қаупі жоғары екенін біздің халыққа айтып шаршадық», – деді Ақтөбе станциясы желілік полиция бөлімінің өкілі Айбек Кетеғұлов.
2022 жылы тәртіп сақшылары белгіленбеген жерден өткен азаматтарға қатысты 212 әкімшілік хаттама толтырып, айыппұл салынып, ескертулер берілген.