Вокзалда жолаушылардың жолын кес-кестеп такси, пәтер ұсынатындарға айыппұл салынады
Маңғыстау облысы бойынша меншікті тілші
Бейнеу станциясындағы желілік полиция бөлімшесі темір жол көлігінде қауіпсіздіктің сақталуына өз үлестерін қосып жүр. Аптаның бір күнін теміржол бойында жүретін жасөспірімдермен түсіндірме жұмыстарын жүргізуге арнайды.
Жолдан әрі-бері күнде өтетін олардың теміржол маңындағы жүріс-тұрысын бақылап, жолдан өту ережелерін ескертіп, жасөспірімдер арасындағы қылмыс, бопсалау, күш көрсету және кешкі мезгілде көшеде жалғыз-жарым жүрмеулерін қадағалайтын тәртіп сақшыларына ата-аналар да алғыс айтады.
Сонымен қатар пойыздан түскен жолаушыларға жөн-жосықсыз қызметін ұсынып, мазасын алатындармен де жұмыс жүргізеді. Такси қызметін ұсынатын немесе жалға пәтер беретін азаматтарға жолаушының жолын кес-кестеп мазасын алмай, заң аясында әрекет ету жолдарын түсіндіреді. Жолаушылар тарапынан шағымдану болса, ҚР ӘҚБтК-нің 449-бабы бойынша жеке тұлғаларға ескерту жасауға немесе бес айлық есептік көрсеткіш мөлшерінде айыппұл салуға тура келетіні ескертіледі. Осы баптың 1-тармағымен 5 азамат әкімшілік жауапкершілікке тартылған.
– Жылдық жоспарымызға сәйкес түрлі профилактикалық шаралар уақытымен жүзеге асырылуда. Жақында Бейнеу айналым депосының ұжымымен кездестік. Өйткені жолаушылар және жүк пойыздарындағы жедел тежеу фактілерінің жиілеп кетуі бәрімізді де алаңдатады. Жыл басынан бері мұндай екі дерек тіркелді. Сол секілді теміржолшылармен жол жиегіндегі қоршауларды қалпына келтіру жайын көтеріп, бұл іске теміржол бойына жақын орналасқан ауыл тұрғындарын да тарту сөз болды, – дейді Бейнеу станциясындағы желілік полиция бөлімшесінің бастығы Насыр Дербисалиев.