Семейде жыл басынан бері 28 техникалық сабақ өткізілген
Абай облысы бойынша меншікті тілші
Семей магистральдық желі бөлімшесінде теміржолшылар шеберлігін шыңдау ұдайы назарда. Әсіресе ПЧ-39 мекемесінің материалдық-техникалық базасы мығым. Техникалық кабинет пен дистанция іргесіндегі полигон толық жабдықталған, арнайы оқу бағдарламаларымен жұмыс істеуге мүмкіндік жасалған.
Жол шаруашылығының мамандары мұнда тек аттестациялық сынақ пен емтихан тапсыруда ғана емес, кез келген уақытта келіп, нұсқаушы берген жаттығуларды орындап, біліктіліктерін шыңдай алады.
Жалпы біліктілікті шыңдау – жол шаруашылығындағы жұмыс өнімділігін арттыратын негізгі факторлардың бірі. Бұл орайда жол дистанциясында жыл басынан бері жоспарға сай 28 техникалық сабақ өткізілген. Өндірістік сабақ нұсқаушыларының арнайы әдістемелерге жүгінетінін де айта кеткен жөн. Мұнымен қатар жаттығу полигондарында жұмысқа жаңадан қабылданған жас мамандар үшін арнайы дәрістер өткізіледі. Мұндай сабақтар желі бойында да ұйымдастырылады.
– Жоспардан тыс дәрістер мен сынақтар да өтіп тұрады. Биыл желі бойында жеделхаттар бойынша бірқатар тәжірибелік сабақтар ұйымдастырдық. Басты орында, әлбетте еңбекті қорғау мен қозалыс қауіпсіздігі тұр. Бұл орайда арнайы деректі фильмдер көрсетіліп, макеттер бойынша да жұмыстар жүргізіледі, – дейді өндірістік дәріс беруші шебер Әбуғали Байғалиев.
Осындай шаралар аясында қазіргі таңда ПЧ-39 жол дистанциясы бойынша жалпы саны 328 адам арнайы аттестациялық сынақты сәтті тапсырған. Десек те, жолшылар біліктілігі дәл қазіргі күндері қайта сынға түсіп жатыр. Яғни, көктемгі комиссиялық тексерулер аясында жол дистанциясы жұмысшыларының біліктілігі сарапқа түсуде.
Жалпы, теміржолшылардың техникалық білім деңгейін көтеру, кәсіби біліктілігін шыңдау бөлімше бойынша күн тақырыбынан түскен емес. Қазіргі күні Семей магистральдық желі бөлімшесі бойынша 30 жасқа дейінгі еңбеккер жастар саны төрт жүздің үстінде. Жұмысқа жаңадан қабылданғандар мен басқа мекемеден ауысып келгендер үшін арнайы жетекші мамандар бекітілген.