Семейдегі рейд кезінде 48 әкімшілік құқықбұзушылық анықталды
Абай облысы бойынша меншікті тілші
Семей ЖТ бөлімшесінде балалардың желі бойындағы қауіпсіздігі аса маңызды мәселелер қатарында тұр. Осы орайда жуырда желілік полиция қызметкерлері «Көліктегі қауіпсіздік» тақырыбында арнайы акция ұйымдастырды.
Шараны өткізудегі мақсат жасөспірімдер бұзақылығының алдын алу, кәмелет жасына толмағандардың түнгі мезгілде бейсауат жүруі мен желі бойында жарақат алуын болдырмау болатын. Осы бағытта өткен аптада теміржолға таяу орналасқан мектептер мен колледждерде түрлі іс-шаралар ұйымдастырылды. Оқу орындарында арнайы дәріс сағаттары өткізіліп, лекциялар тыңдалып, әңгімелесулер жүргізілді. Қозғалған негізгі тақырып әрине теміржол нысандарына қарасты аумақтардағы қауіпсіздік, қылмыстық, әкімшілік кодекс нормалары болды.
– Барлығы бес мектеп, екі колледжде болып профилактикалық-ақпараттандыру жұмыстарын өткіздік. Жергілікті еңбек ұжымдарымен де қауіпсіздік тақырыбында түсіндіру жұмыстары жүргізілді және үш теміржол вокзалында кездесу ұйымдастырылды. Теміржол желісі өтетін елді мекен тұрғындарымен де жүздесіп, тақырып аясында жұмыс жүргіздік. Сонымен қатар 10 мәрте жолаушылар пойызында кездесу өтті. Теміржол мекемелерінің қатысуымен дөңгелек үстелде бас қосып, ортақ мәселелерді талқыладық, – дейді Семей станциясындағы ЖПБ әкімшілік полиция бөлімінің бастығы Рүстем Әбеуов.
Акция барысында арнайы рейд те жүргізілген. Алты рет өткізілген тексеру шаралары аясында 48 әкімшілік құқықбұзушылық анықталды. Бұған дейінгі рейдте анықталған жағдайлармен салыстырсақ, бұл біршама төмен көрсеткіш.