Жолдағы шұғыл тежеу оқиғаларының артуы алаңдатып отыр
Абай облысы бойынша меншікті тілші
Жуырда Аягөз жол дистанциясында жолшылар мен көліктегі тәртіп сақшыларының қатысуымен арнайы жиын өтті. Дөңгелек үстелдің басты тақырыбы жол дистанциясының қызмет көрсету аумағында пойыздардың шұғыл тежелу фактілерінің көбеюі болды.
Полиция капитаны Рүстем Әбеуов өз сөзінде теміржолдағы қауіпсіздікті қамтамасыз ету мақсатында қоғамдық қауіпсіздікті қамтамасыз етудің 2024-2028 жылдарға арналған тұжырымдамасына сәйкес бірлесе қызмет атқарып, тығыз қарым-қатынаста жұмыс істеудің маңыздылығына тоқталды. Осы орайда 2022-2024 жылдарға арналған ҚР теміржолдағы мүліктің сақталуын және қауіпсіздік деңгейін арттыру жол картасының 4-ші тармағында көрсетілгендей өтуге тыйым салатын тану белгілерін жаңарту, теміржолға белгіленбеген жерлерден бөгде адамдардың өтуін болдырмау мақсатында қоршаулар орнату, желі бойына ірі қара малдың шығып кетуін болдырмау үшін қоршауларды жанарту керектігін баса атап өтті.
Ал, өз Аягөз жол дистанциясының бастығы Нұрлан Шәріпханов аталған тұжырымдамаға сәйкес полиция қызметкерлерімен бірге ұдайы профилактикалық түсіндірме жұмыстары жүргізілетінін, өтуге тыйым салатын тану белгілерін жаңарту үзіліссіз жүріп жатқанын айтты. Сонымен қатар Аягөз жол дистанциясының қызмет көрсету аумағы 225 шақырым бас жолды құрайтынын, оның 76 шақырымына өз күштерімен қоршаулар орнатылғанын, биылғы жылдың соңына дейін тағы да 14,6 шақырымға жуық қоршаулар орнату жоспарланғанын айтты. Мұнымен қатар, жергілікті ауылдық окруктер әкімдіктері қажетті техникалармен және сымтемірлермен көмек көрсеткен жағдайда, жыл соңына дейін бұл қоршауларды 30 шақырымға дейін ұзартуға болатынын жеткізді. Қазіргі таңда жергілікті әкімдіктерге көмек көрсету үшін сұранысхаттары әзірленіп жатқан көрінеді.
Басқосуға НЖС-6 бөлімшесінің пойыз қозғалысының қауіпсіздігі бөлімінің басшысы Қанат Әділханов, ПЧ-42 бастығы Нұрлан Шәріпханов, Семей станциясындағы Желілік полиция бөлімшесінің бастығы, полиция капитаны Рүстем Әбеуов және Аягөз ст.ЖПб-нің бастығы полиция майоры А. Силямгазинов арнайы келіп қатысты.