Өткелге «Сергек» камерасын орнатуды сұрайды

Теміржол мен автокөлік жолы қиылысатын өткелдер мәселесі соңғы жылдары жиі көтерілетін тақырыпқа айналды. Жасырын емес, өткелдегі жол-көлік оқиғасының салдары орны толмас өкінішке ұрындырып, қайғылы жағдаймен аяқталып жатқан оқиғалар аз емес.

Елімізде ғана емес, шет елдерде де теміржол өткелінде түрлі жағдайлар кездесіп жатады. Соның кесірінен айдың-күннің аманында қаншама жол көлік оқиғалары орын алып, қанша адамның өмірі қиылып жатыр...  

Қауіп-қатердің алдын алып, келеңсіз жайттардың жолын кесіп, теміржол өткелдерінде жүріс-тұрыс тәртібін орнатамыз дейтін маңғыстаулық теміржолшылар тексерістер мен рейдтік шараларды жиі өткізеді. Қазан айының 10-13 аралығында Маңғыстау жол дистанциясының мамандары осы бағытта кезекті іс-шара ұйымдастырды. Жаңаөзен қаласы мен Қарақия, Мұнайлы, Маңғыстау аудандарындағы теміржолға жақын орналасқан елді мекендерге және теміржолдан өткен көлік иелерімен профилактикалық жұмыс жүргізген олар ескерту парақшаларын да таратты. Оның алдында «Назар аудар, өткел!» айлығын өткізген болатын. Осы іс-шаралар кезінде қаншама автокөлік жүргізушісін өткелден өту тәртібінен тағы бір рет хабардар етті.      

– Маңғыстау жол дистанциясына қарасты 34 теміржол өткелі бар. Оның төртеуі күзетпелі, қалғаны күзетсіз. Біз ай сайын осы өткелдерде түсіндіру жұмыстарын жүргізіп тұрамыз. Жыл басынан бергі тоғыз ай қорытындысы бойынша сегіз жүзден астам адаммен кездесіп, теміржолдан өту ережесін түсіндірген екенбіз. 1-31 тамыз аралығында өткен айлық аясында да бұл бағытта біраз жұмыс атқардық.  

Кейінгі кездері бір учаскеде жол-көлік оқиғасы қайталанып тұрғаны бізді алаңдатады. Маңғыстау – Өзен учаскесінде Маңғыстау-Р перрегоны 13-шақырымында 2020 жылы да, 2021 жылы да осындай жағдай болған еді. Биылғы жазда дәл сол жерде тағы да екі рет жол-көлік оқиғасы тіркелді. Бұл өткел көлік қатынасы жиі жолдың бойында. Ол жерден Құрыққа кететін, әскери бөлімге баратын Батыр ауылы бағытындағы автокөліктер көп жүреді. Соған байланысты теміржолдан өтетін автокөліктерге және жанында орналасқан елдімекен тұрғындарына, автопарк иелеріне, мекемелерге теміржолдан өтуде өте сақ болып, немқұрайлы қарамауды жиі ескертудеміз. Жоспарлы профилактикалық жұмыстардан бөлек жол полициясымен бірлесе рейдтерге де шығып тұрамыз. Тоғыз айда сегіз рет рейдтік шара жүргіздік, – дейді Маңғыстау жол дистанциясының жетекші жол инженері Мұхтар Кульчанбаев.  

Айтуынша, дистанция мамандары өткелдегі жол-көлік оқиғасының алдын алу мақсатында аудандық жол полициясына жақын жерлерге «сергек» камерасын қою туралы хат жолдаған. Сонда қауіп бұлты әл де болса сейіліп, ескертуді елемейтін жүргізушілер айыппұлдан сескеніп, өткелден өту ережесін сақтар еді деп санайды жолшылар.