Теміржолшылар өртті сөндіруге атсалысты
"Қазақстан теміржолшысы" газетінің Жамбыл облысындағы меншікті тілшісі
Өткен аптада «ҚТЖ» ҰК» АҚ – «Тараз көліктегі оқу орталығы» филиалының курс тыңдаушылары, бір топ дрезина жүргізушілер Тараз қаласы М.Тынышбаев көшесі 28/1 мекенжайында тұтанған өртті дер кезінде ауыздықтауға атсалысып, алғысқа бөленді.
Кезекті оқу курсына келген теміржолшылар түнгі сағат 22.00-де таза ауамен тыныстау үшін далаға шығады. Тура осы кезде оқу орталығының жатақханасы жанындағы тұрғын үйден өрт тұтанғанын көріп қалып, дереу жүгіріп жетіп, қызыл жалынды ауыздықтауға кіріседі.
Түнгі кезекшіліктегі жатақхананың вахтер-күзетшісі Ләззат Бижігітова 102 нөміріне қоңырау шалып, 2 өрт сөндіру машинасы келгенде теміржолшы жігіттер қызыл жалынның бетін қайтарып үлгерген. Курс тыңдаушылары қатарында ПЧ-53 Шымкент жол дистанциясының маманы Дәулет Құттыбай, ЭЧ-19 Алматы электрмен жабдықтау дистанциясы және ПЧ-43 жол дистанциясының дрезина жүргізушілері Ерлан Қуанышев, Дулат Бақытұлы, Семен Давыдкин, Достық станциясынан ПЧ-43 қызметкерлері Самат Бекенов пен Асхат Асылбай бар.
– Біздің курс тыңдаушыларының дер кезінде көмекке келуінің арқасында өрт күш алып, тұрғын үйге жетпей сөндірілді. Тұрғындар аман-есен. Ешкім зардап шеккен жоқ. Үй иелері естерін жиған соң келіп теміржолшыларға алғыстарын айтып жатыр, – дейді оқу орталығының кураторы Ойрат Бейсембин.
Айта кету керек, «Тараз көліктегі оқу орталығы» филиалының осы М.Тынышбаев көшесінде орналасқан өз жатақханасы бар. Орталыққа барлық өңірлерден тыңдаушылар келіп, оқу курстарында біліктіліктерін арттырады.