Бейнеу станциясында биыл 5 адамнан есірткі анықталды
Маңғыстау облысы бойынша меншікті тілші
Жыл басынан бері Бейнеу станциясында жолаушылар арасында 5 адамнан есірткі заттары табылған. Тыйым салынған өнімді өзімен бірге алып жүрген азаматтарға қатысты тиісті шаралар қолданылып, ісі сотқа жіберілген.
Бейнеу станциясындағы желілік полиция бөлімшесінің мәліметінше, өткен жылы салыстырмалы мерзім ішінде есірткімен 4 жолаушы ұсталған. Биыл сондай-ақ станция вокзалында атыс қаруының оғын алып бара жатқан жолаушы да анықталған. Ол теміржол вокзалындағы бақылап өткізу құрылғысының көмегімен табылған. Мұндай дерек былтыр да кездескен екен. Дәл осындай атыс қаруының оғы мен суық қару алып жүрген азаматтар назарға іліккен. Сондықтан желілік полиция қызметкерлері қашанда сақтық керектігін, бөтен адамдардың күдікті сәлемдемесін, сөмкесін алып, тасымалдауға болмайтынын алға тартады. Мұндай ескертулерді вокзалда дикторлар белгіленген уақытпен үнемі хабарлап отыруы жолға қойылғанын айтады.
– Бейнеу тоғыз жолдың торабы деп бекер аталмаған ғой. Қатынасы көп, келіп кететін халық аз емес, пойыздар әрлі-берлі толассыз ағылып жатады. Станциядан халықаралық бағыттағы пойыздар да өтеді. Көп адам жүрген жерде түрлі қауіп те болуы ықтимал. Сондықтан теміржол аумағындағы қауіпсіздіктің сақталуы біздің қызметкерлердің үнемі қадағалауында. Мұнда күніне орта есеппен 14-16 пойыз өтеді. Жолаушылар пойызының бәрін тексеріп, қарап жүретін жігіттеріміз бар және «Робби» деген қызметтік итіміздің де көмегі көп. Кішкентайынан үйретілген, иіс сезгіш, есірткі өнімдерін бірден табады. Жолаушы халықтың қауіпсіздігі мен тыныштығын күзеткен қызметкерлерімізбен бірге жүреді, – дейді Бейнеу станциясындағы желілік полиция бөлімшесінің басшысы Насыр Дербісалиев.
Желілік полиция үшін әр аптаның бейсенбі-жұмасы профилактикалық күндер. Бұл күндері мекемелерден бастап мектептерге дейін теміржолдағы қауіпсіздік, тәртіпті қадағалау бағытында түрлі түсінік жұмыстары жүргізіледі. Рейдтерге шығады. Осындай іс-шаралар барысында бірінші тоқсанда 168 әкімшілік материал жазылған, оның 20-дан астамы шетел азаматтарына қатысты. Сонымен қатар тағы тоқсаннан астам адам теміржол аумағында қоғамдық орынды ластау, алкоголь ішімдігін ішу баптарымен тіркелген.