Басты мақсат – «нөлдік травматизм»
Абай облысы бойынша меншікті тілші
Семей локомотив пайдалану депосы өндірістік қауіпсіздік пен еңбекті қорғаудың жаңа кезеңіне көшті. Бұл бағытта жүйелі жұмыс жүргізілуде.
Мәселен, бүгінгі таңда депода әрбір сейсенбі күні локомотив бригадаларымен түсіндіру жұмыстары тұрақты түрде жүргізіледі. Онда жалақы төлеуден бастап қозғалыс қауіпсіздігін сақтау талаптарына дейін сөз болады. Өндірістік дәрігерлерге де кезек беріліп, жұмыс барысындағы оқыс оқиғалар кезіндегі жедел әрекет мәселелері кеңінен түсіндіріледі.
Негізінен еңбекті қорғау секторы ұйытқы болатын мұндай техникалық дәрістер барысында «Алғашқы медициналық көмек көрсету» шараларына басымдық беріледі. Мысалы, соңғы ұйымдастырылған дәріс кезінде жарақат алу кезіндегі қан тоқтату, жүрекке массаж жасау мен өкпені жасанды түрде желдету жайында түсіндіру жұмыстары жүргізілді.
Депода өндірістік қауіпсіздікке ерекше мән берілуі тегін емес. Биылғы жылы наурыз айының 7-і күні жазатайым оқиға орын алып, бір қызметкер зардап шеккен болатын. Сол тәрізді көктемгі комиссиялық тексеру кезінде де локомотив шаруашылығына көп сын айтылған-ды. Келер жылға алға қойылып отырған басты мақсат – «нөлдік травматизм» болып отыр.