Ажалмен ойнамаңыз: Теміржол қателікті кешірмейді
Теміржол – секундтық қателікті де кешірмейді. Жыл сайын елімізде шойын жолдың үстінде жүздеген адам денсаулығынан айырылып, өкінішке орай, опат болып жатады. Статистикаға сүйенсек, бұл оқиғалардың басым бөлігі адамдардың қарапайым қауіпсіздік ережелерін елемеуінен болады екен.
Теміржол бойындағы кез келген заңсыз әрекеттің соңы ауыр жарақат немесе өлім. Мыңдаған тонна жүкті сүйреп келе жатқан локомотивті бірден тоқтату мүмкін емес екенін көпшілік түсіне бермейді.
Жүк пойызының салмағы орта есеппен 3-6 мың тоннаға дейін жетеді. Машинист шұғыл тежеуді басқан күннің өзінде, пойыз инерциямен 800 метрден 1,5 шақырымға дейін сырғып барып бірақ тоқтайды. Яғни, сіз рельстің үстінде пойызды көрген сәтте, оның сізге соғылмау мүмкіндігі нөлге тең болуы мүмкін.
Қазіргі пойыздар бұрынғыдай гүрсілдеп келмейді. Олар өте жылдам және салыстырмалы түрде дыбыссыз қозғалады. Әсіресе, желді күні немесе қарсы бағытта пойыз өтіп бара жатқанда, екінші жолдан келе жатқан құрамның дыбысы мүлдем естілмей қалуы мүмкін.
Теміржол желісіндегі кернеу 27 000 вольтқа дейін жетеді. Тоққа соғылу үшін сымға қол тигізу шарт емес, оған 2 метрден жақын келудің өзі ажал құштыруға жеткілікті.
Жолдан өтерде нені ескеру керек?
Теміржол бекеттерінде немесе өткелдерде қауіпсіздікті сақтау бұл мәдениет қана емес, бұл өмір сүру қажеттілігі. Мамандар мынадай негізгі ережелерді сақтауға шақырады:
Құлаққап пен смартфон басты жау. Рельс арқылы өткенде құлаққапты шешіп, телефонды қалтаға салу керек. Музыка тыңдап тұрған адам локомотивтің дабылын естімей қалады. Смартфонға үңілген адам айналасындағы қауіпті сезбейді.
Арнайы өткелдерді ғана пайдалану. Теміржолды тек белгіленген көпірлер, жерасты өткелдері немесе арнайы жаяу жүргіншілер жолағы арқылы кесіп өту қажет. «Жолды қысқартамын» деп рельстің үстімен секіру ажалға жасалған алғашқы қадам.
Вагондардың астынан өтпеу. Тұрып тұрған пойыз кез келген секундта қозғалып кетуі мүмкін. Вагон астымен өтпек болған адамның мүгедек болып қалу немесе тірідей бөлшектелу қаупі 100%.
Теміржол жиегінде тұрғанда рельстен кемінде 5 метр қашықтықта болу керек. Пойыз өте жоғары жылдамдықпен өткенде ауа ағыны пайда болып, жақын тұрған адамды пойыздың астына тартып кетуі мүмкін.
Бұл мәселедегі ең ауыр тақырып балалардың қатысуымен болатын оқиғалар. Ата-аналар балаларына теміржолдың ойын алаңы емес екенін кішкентайынан түсіндіруі тиіс. Рельстің үстіне тас қою, вагон үстіне шығу немесе селфи жасау секілді ермектердің соңы үлкен қасіретке әкеледі.
Теміржол қателікті кешірмейді. Бірнеше минутты үнемдеймін деп бүкіл өміріңізді қиюға тұрмайды. Сізді үйде жақындарыңыз күтіп отырғанын ұмытпаңыз. Әрбір басқан қадамыңызға жауапкершілікпен қарау тек өзіңіздің ғана емес, машинистердің де, жақындарыңыздың да тыныштығы.