Теміржолшылар төтенше жағдайға қаншалықты дайын?
Атырау облысы бойынша меншікті тілші
Атырау магистральдық желі бөлімшесі, «ҚТЖ-Жүк тасымалы» ЖШС «Атырау» және «Қазтеміртранс» филиалдары азаматтық қорғаныс іс-шаралары аясында «Өрт кезінде қызметкерлерді эвакуациялау» тақырыбында қалалық төтенше жағдайлар басқармасымен бірлескен практикалық оқу-жаттығу өткізді.
Қандай да төтенше жағдайлар кезінде адамдардың абдырап қалатыны рас. Ондайда салқынқандылық пен ұстамдылық аса қажет. Сондықтан оған жаттығып отырудың артықтығы жоқ. Аталған іс-шара Атырау өңірінде ауа температурасының күрт жоғарылауы мен өрт қаупі туған жағдайда теміржол қызметкерлерінің төтенше жағдайлар кезіндегі іс-қимылдарын пысықтауға, қауіпсіздік мәдениетін арттыруға және төтенше жағдайларға дайындық деңгейін жетілдіруге бағытталған.
Жаттығу шартына сәйкес, ғимараттың екінші қабатында электр желісінің қысқаша тұйықталуынан өрт шығып, қапталдас тұрған басқа мекеме ғимаратына қарай өршуі мүмкін деген болжаммен дабыл қағылды. Бірыңғай құтқару қызметі «112» және ТЖД кезекші бөліміне шұғыл хабарлама беріліп, сол сәтте қызметкерлерді эвакуациялау басталды. Жиналу алаңында Азаматтық қорғаныс саласының жетекші инженерлері қызметкерлерге дабылға назар аударып, кері байланыс жасаудың тәртібін түсіндірді. Өрт сөндіруші «112» қызметкерлері оқиға орнына шұғыл жетіп, бірнеше минутта өртті сөндірді. Өрт қаупі жойылып, толық қауіпсіздік қамтамасыз етілген соң қызметкерлер еңбек орындарына оралуға рұқсат алды.
«Тілсіз жаудың қашан, қайдан келіп қалғанын білмей қалатын жағдайлар көп кездеседі. Әсіресе жүздеген адам еңбек ететін ғимаратта өрт шыққан не басқа бір төтенше жағдай орын алған кезде қызметкерлер қалай әрекет етуі керек, ондайда өздерінің және айналасындағылардың қауіпсіздігін сақтау үшін не істемек керек? Міне, осыны білу үшін бүгінгідей оқу-жаттығу жұмыстары жиі өтіп тұруы қажет, – дейді жаттығуға қатысқан мекемелердің Азаматтық қорғаныс және төтенше жағдайлардың алдын-алу инженерлері Марта Сисенова мен Нұрлан Сұлтанғалиев.
