Сырдария тасыған жағдайда теміржолшылар қауіп-қатерге дайын

Қызылорда өңірі үшін көктемде Сырдың тасу қаупі жоғары. Қайсыбір жылдары арнасынан шыққан дария айналасындағы біраз елді мекенді әбіржіткенін неге ұмытайық. Сондықтан жыл сайын қар еріп, су көбейген кезде жергілікті теміржолшылар дариямен шектесетін станциялар мен теміржол телімдерін бақылауда ұстайды.

Алайда биыл қардың аз түсуі, көктемде жауын-шашынның да мөлшерден аспауы себепті Сырдария айтарлық қауіп төндіріп тұрған жоқ. Дегенмен қандай да бір тосын жағдай бола қалғанда қамсыз қалмауды көздеген аймақ басшылары қауіпті учаскелерді, жасанды құрылыстарды тексеріп, су шайып кетуі мүмкін канал, арық-жыраларды, көпірлердің асты-үстін тазартып, сақтық шараларын жасап отыр.

Қазіргі уақытта құзырлы органдармен тығыз қарым-қатынас орнатып, ауа райын да бақылауда ұстап отыр. Облыс бойынша су ресурстарын пайдалануды реттеу және қорғау жөніндегі Арал-Сырдария бассейндік инспекциясының Су қорларын қорғау және мемлекеттік бақылау бөлімі басшысы Зейнулла Қазтоғановтың мәліметіне сүйенсек, Шардара су қоймасында қазіргі таңда жиылған 5 млрд 23 млн текше метр судың Сырдария өзенінің бойымен төменге қарай секундына 200 текше метр, Көксарай су торабынан секундына 100 текше метр су босатылып, екі арнаның жиынтығында Қызылорда бағытына секундына 300 текше метр су ағып келуде екен. Дегенмен мұнша көлемдегі дария суынан аймақ теміржолына қауіп-қатер жоқ көрінеді. Қызылорда магистральдық желі бөлімшесі жол бөлімінің инженері Аралбек Нұрмағанбетов осылай дейді.

Қызылорда су торабынан Сырдария өзені арнасымен төменге қарай секундына 382 текше метр су босатылып жатыр екен. Ол судың 259 текше метрі Айтек су торабына, Қараөзек арнасымен 105 текше метрі ағып өтуде. Қазалы су торабынан секундына 187 текше метр су ағып өтіп, Ақлақ су торабынан секундына 78 текше метр Кіші арал теңізіне құйылуда екен. Қысқасы, ахуал толық бақы- лауда дейді жергілікті теміржолшылар.