Таразда болашақ мамандарға электр және автоматтандырудың маңызы түсіндірілді
"Қазақстан теміржолшысы" газетінің Жамбыл облысындағы меншікті тілшісі
Теміржол жүйесінде электр және автоматтандыру саласының маңызы зор. Сондықтан электр жүйесін реттеу, тоқ жүйелерін бақылау және автоматтандырылған басқаруды игеру – болашақ теміржолшылар үшін аса қажет дағдылар.
Тараз көлік және коммуникация колледжінде өткен «Темір жол – қауіптілігі жоғары аймақ» тақырыбында ашық сабақта болашақ мамандарға пойыздар қозғалысындағы электр және автоматтандыру жүйесінің маңызы мен қауіпсіздік талаптары түсіндірілді.
Ашық сабаққа «Қазақстан темір жолы» ҰК» АҚ «Жамбыл магистральдық желі бөлімшесі» филиалының ЭЧ-21 Жамбыл электрмен жабдықтау дистанциясының өндірістік оқыту шебері Марат Құлбаев арнайы шақырылып, білікті маман электрмен жабдықтау құрылғыларына техникалық қызмет көрсету барысын арнайы сызбалар арқылы көрсете отырып, студенттерге қауіпсіз еңбек процесін қамтамасыз ету үшін қойылатын талаптар туралы айтып берді.
– Мысалы, электромонтер – қауіп-қатермен бетпе-бет жұмыс істейтін, электрмен жабдықтау құрылғыларына техникалық қызмет көрсету және жөндеу технологиялық процесін қамтамасыз ететін маман. Мұндайда сауатты қимылдап, өзін қорғай алған маман ғана қауіп-қатердің алдын ала алады. Сондықтан дистанцияда өтетін өндірістік сабақтарда алдымен қауіпсіздік талаптары түсіндіріледі, – деді өндірістік оқыту шебері.
Тәжірибелік сабақта еңбекті қорғау мәселесінің болашағы мен маңыздылығы айтылды. Сонымен қатар темір жолда орын алған жазатайым оқиғалар бойынша талдау жүргізілді.